Heyetê HDPyî yo ke Hemhetkarê Hemserekanê Berpirsîyarîyê Îdareyanê Herêmîyan ê HDPyî Salîm Kaplan, Vervatoxa Komîsyona Heqanê Merdiman û Huqûqî Ayşe Acar Başaran, Wekîlê Çewlîgî Erdal Aydemîr, Wekîlê Îstanbulî Dilşat Canbaz û Wekîla Mûşî Şevîne Coşkun ra yeno meydan erdlerzî ra dima Xarpêt de tay cigêrayîşî kerdî û dima zî kombîyayîşêkê çapemenîye kerd. Heyetî îfade kerd ke hetkarîyê ke hetê HDPyî ra ameyî arêdayene do bêrê resnayene mexduran.

Hemserekê HDPyî yê Xarpêtî Bakî Yildirimî vat: "Ma hêla verêne ya erdlerzî de dest pê xebatan kerd û masaya krîzî awan kerd. Ma Sîvrîce de, dewan de û qezayanê bînan de tesbîtî kerdî. Xebatê ma do dewam bikerê."

Vervatoxa Komîsyona Heqanê Merdiman û Huqûqî Ayşe Acar Başaran vat: "Ma nê erdlerzî de zî dî ke Tirkîya seba erdlerzan amade nîya. Eke bînayêke bîya gorê 4 kesan eleqeyê ci bi xozayî çin o. Nê felaketî peygoşîye, bêamadekarîya îqtîdarî ra semed ameyî meydan.

Ma Sîvrîce û Maden de xo resna 60 dewam ke dewlete xo nêresna nê cayan. Dewa Çevrîmtaşî de dewijan bi xîretanê xo 2 mergî û 3 birîndarî binê xirbeyan ra vetî.

Ma netîceyê cigêrayîşanê xo de dî ke dewlete hetkarîye nêresnaye 60 dewan û Sîvrîce. Ma dî ke hetkarîyî hetê serekê AKPyî yê Sîvrîce ra merdimanê ci rê ameyî vilakerdene. Dewe de hewcedarîyê şarî nêameyî peydakerdene.

Xarpêt de zimistan zaf çetin ravêreno. Merdimî cemxaneyan de ameyî pêser la cemxaneyî qîm nêbenê. Hewceyê xeymeyan esto la xeymeyî nêameyî dayene. 

27 şaredarîyê ma xebatanê hetkarîye kenê.

Tîya de rastîyî estî. La îqtîdar vano ke komel de hîşmendîya başe esta. Heta ke na hîşmendîye bi rastîye nêra têhet ma do muxalefetê xo dewam bikerê."