Cengîz Holdîngo ke şîrkertanê hemkaran ê Erdoganî ra yew o pê rayîrê taşeronan destê xo erzeno Başûrê Kurdîstanî.

Cengîz Holdîngo ke wextê AKPyî de şampîyonê îhaleyan o, talanê Tirkîya û Vakurê Kurdîstanî reyde, her warê Tirkîya de zî hetê leşkerî û sîyasî ra hêzêk o. Cengîz Holdîngî seba PDKyî şîrketêka biasayîş a. Meydanê Teyarayan ê Hewlêrî, rayîrê Hewlêr-Altinkopruyî pê rayîrê şîrketa qirkere Heskîf ameyî viraştene. Nika zî nê taşeronê Cengîz Holdîngî daranê Başûrî birnenê benê. Şirîkê na şîrkete yê Başûrî Endamê Polîtburoyî yê PDKyî Elî Ewnî yo ke pê dişmenîya xo ya vera Têgêrayîşê Azadîye şinasîyeno. Goreyê xebera Ajansê Mezopotamya 3 şîrketê taşeronî yê Cengîz Holdîngî pabesteyê Elî Ewnîyî yê û nê şîrketî Herêmanê Pawitişî yê Medya de daran birnenê û benê Tirkîya. Nê şîrketî seba ke nê herêman de baregehê tirkî ronîyê rayîran zî virazenê. Sersefîrê Tirkîya zî cara eşkera kerd ke înan nê erazîyî hêrînayî, seba viraştişê rayîran daran birnenê. Sersefîrî da zanayene ke hayîya selahîyetdaranê Herêma Kurdîstanî zî pê naye esta.

Şîrketa serranê 1990î

Cengîzan wextê Serekwezîrîya Mesut Yilmazî de Projeyê Rayîrê Qeraxî yê Dengizê Sipîyî zî girewt û bi nê hawayî serranê 90an de rayîrê xo eşkera kerdî. La no holdîng a raşte wextê AKPyî bi pîlêr. Ewro sermayeya holdîngî zaf pîl a û binê sîwana ci de 35 şîrketî estê. Cîroyo serrane yê holdîngî 5 mîlyar dolar o.

Lîmak Holdîng, Kalyon Holdîng, Kolîn Holdîng û Makyol Holdîng û Cengîz Holdîngî 5 serranê peyênan de karê xo pîl kerdî. Nê şîrketê ke nêzdîyê AKPyî yê sicîlê înan zî gemarin o. 

Dostanîya AKP û Cengîz Holdîngî têna îhaleyan ser o nîya. Serra 2010î de Cengîz zî tede deynê bace yê 5 komanê cîyayan ameyî estaritene. Deynê 420 mîlyon lîra yê Mehmet Cengîzî zî ame estaritene.

Awanîya betonarme Tirkîya û Vakurê Kurdîstanî de wextê AKPyî de zêdîyaye. 2004 de pê vurnayîşê Qanûnê Madenî zî girewtişê destûrê xebitnayîşê madenî asan bi. Pê Qanûnê 5162. zî TOKÎ pê wezîfeyanê taybetan ame xurkerdene. TOKÎ dima de erdê xezîneyî pê destûrê Serekwezîrîye bêbedel girewt, şîrketanê awanîye yê AKPyî rê ame pêşkêşkerdene. Hîkayeya Torunlar, Soma Holdîng, Kolîn û xeylêk şîrketan seyci yê.

Wextê şerê Azerbeycan-Armenîstanî de zî Cengîz Holdîngî rê 'holîye' ameye kerdene. Azerbeycan de pêro karê madenî û cewheran hetê Îlham Alîyevî ra dîyayî Cengîz Holdîng, Demîrorenan, Kalyon Înşaat, Etî Madenî.

Projeyê Talanî

Goreyê agahîyanê ke Cengîz Holdîngî keyepelê xo yê înternetî de weşanayî nê projeyê talanî înan Kurdîstan de kerdî:

-Awanîya Awbendê Ilisu û HESî

-Pîrê Koma Heskîfî yê Rayîranê Êlih-Heskîf û Êlih-Sêrtî

-Meydanê Teyarayan ê Hewlêrî

-Karê Rehabîlîtasyonî û Viraştişê Rayîran ê Hewlêrî-Altinkopruyî (Perdî)