Doneyê TUÎK'î eşkere kenê ke bêkarîye bîye zêde. Goreyê doneyanê fermîyan bêkarîye Hezîrana 2019'an de goreyê serranê peyênan 938 hezar kesî zêde bî û na hûmara bîye 4 mîlyon û 253 hezar. Bêkarîye sê ra 2,8 zêde bîya û nisbeto newe bîyo sê ra 13. Ame vatene ke hûmara rastikêne a bêkaran nê nisbetî ra zêdêr a.

Bêkarîya mabenê serrîyanê 15-24'an de sê ra 5,4 zêde bî û bîya sê ra 24,8. Nisbetê bêkarîye ya 15-64 serrîyan zî bîyo sê ra 13,3. Nisbetê kesanê ke bê asayîşo cematkî ciwîyenî zî bîyo sê ra 35,2.