Wekîla HDPyî û huqûqnase Merale Daniş Beştaş derheqê Qirkerdişê Parisî de 8ê çeleyî de vernîzyazêk pêşkêşê meclîsî kerd û vat peyê nêameyîşê edaletî yê 7 serran de hemkarîyêka mîyanneteweyîye esta. Beştaş ANF reyde qisey kerd û ard ziwan ke destpêkî ra nata yeno waştene ke dewa bêra nimnayene.

Beştaşe derheqê suîkastî de bale ante dokumentanê MÎTî yê ke eşkera bîyî ser û îfade kerd ke dosyaya dewa bi zanayîşî ameye nimnayene. Beştaşe vat: "Ma baş zanenê ke kiştox têna Omer Guney nîyo. Omer Guney Tirkîya ra têna nêvejîyo û 3 sîyasetmedarê kurdî hedef nêkerdê. Têkilîya ci ya bi hêzanê tarîyan û paramîlîteran esta. Dosya de bale yena anetene nasye ser la tehqîqat nêno kerdene. "

Beştaşe vist vîrî ke Fransa seba eşkerakerdişê na dewa bêzerrî ya û vat seba ke qirkerdiş welatê înan de ame kerdene, ê neçare yê ke na dewa roşnî bikê. Beştaşe ard ziwan ke mergê Omer Guneyî ra dima Fransa bîye zerrîşenik û dewa qedîyaye. Beştaşe da zanayene ke kiştox merdbi zî xayînêkê Tirkîya yo û Tirkîya derheqê ney de eşkerayîye nêdaye. Beştaşe vat: "Eşkera yo ke babeta nimnayîşê qirkerdişî de Tirkîya û Fransa hemkarîyêk kenê."

Beştaşe ard ziwan ke eşkerabîyayîşê Qirkerdişê Parisî zaf girîng o û vat, "No eşkeno bibo mefteyê haştîye yê Tirkîya." Beştaşe eşkera kerd ke nêroşnîkerdişê qirkerdişî semedê binpaykerdişê heqanê merdiman, dewamkerdişê şerî, xorînkerdişê çareserîye û taloqkerdişê haştîye yê. Beştaşe vat: "Qirkerdişê Parisî bêro nimnayene zî ma do heta peynî na dewa teqîb bikerê."