Hemsereka Pêroyî ya HDPyî Pervîne Buldan bi tirkî û kurdkî silam kerd beşdaran.

Qiseykerdişê Pervîne Buldan wina yo: 

''Ez Selahattîn Demîrtaş , Fîgen Yuksekdag , Sehahat Tuncel, Abdullah Zeydan û Selma Irmak, Îdrîs Bluken, Aysel Tugluk Gulser Yidirim, Çaglar Demîrel, Gultane Kişanak, Nuran Îmîr, Nurhayat Altun, Selçûk Mizrakli, Bekîr Kaya û zaf kesanê ke zîndan de yê înan rê selam kena. Birêz Ocalanî rê zî ke mîmarê HDPyî yo selam kena.

Bi HDPyî Ameyoxo Demokratîk Mumkîn o

Ma bi xoverdayîşî ameyî. Zaf embazê ma sey rehîn ameyî tepişene la ma bîyî bi mîlyonan. HDP bi hemkaranê xo wayîrê hêzêkê pîlî yo. Weçînayîş de zaf astengî vejîyayî ma vernî. La ma ê rijnayî û ameyî. Ma hem sindoqan de hem zî meydanan de têkoşîn kerd. Grevê vêşanîye yê Leyla Guven ê vera tecrîdî morê xo da merdimîye. AKP-MHPyî waşt ameyoxê Rojhelatê Mîyanênî hucreyêkê 13 metrekareyî de bifatisnê. La vera naye Rayber Apoyî vat: 'Têna şarê ma ney ganî pêro şarê herême binê edemokrasîyî de bêrê pawitene û no zî destê ma de yo.'

Şarê ma bedelê pîlî dayî. 38 şaredarîyê ma ameyî xespkerdene. Vatêne: kurdî nêeşkenê biweçînê û îdare bikerê. La se kenê wa bikerê. Kurdî do biweçînê û îdareyê şaristananê xo bikerê. Şarê ma wisarê demokrasîyî biciwîyê. Berê Îmraliyî do haştîye û demokrasî rê bêrê akerdene. Heta ke ma bigêrê çareserîye polîtîkayê bêçareserîyî yê AKPyî do ser nêkewê. Îradeyê şaran AKPyî ra pîlêr o.

Qeyûmê AKPyî do ey reyde şorê. Tirkîya, Sûrîye û Rojhelatê Mîyanênî de her çi vurîyeno. No vurnayîş bi hêzê demokrasîyî yê pîlî yê şarê kurdî û demokratan do cayê xo bigêro. Şarê kurdî do bêstatubîyayîşî qebul nêkero.Ganî kurdî yewîya xo awan bikerê. Xelisîyayîşê şarê kurdî bi yewîye mumkîn o. Seke şaîrî vato: 'Kurdênê bibê yew eke şima nêbê yew, şima şorê yew bi yew.' Yewîya ma estbîyayîşê ma ya, azadîya ma ya. Roştîya azadî ya ke Rojawan de bila bena do Mahabad, Silêmanî, Amed, Anqara û Heleb zî roşnî bikera.

Darbeya Zereyê Darbe

Merdimî yenê remnayene, îşkencekerdene, qetilkerdene. Sîyasetmedarî û muxalîfî sey rehîn yenê tepiştene. Nînan Roboskî, Pirsûs, Garê Anqara, Cizîr, Sûr, Nisêbîn, Gever û Amed de zaf sucî kerdî. Nînan bi Rewşa Îstîsnayîye, KHKyan û wedaritişê destnêdayîşan vera şarî û muxalefetî zereyê darbe de darbeyêke kerde. Wexto ke babete bena kurdî muxalîfî, demokratî, rêxistinî pêro vera kurdan benê yew û benê sey dewlete. Ganî wina nêbo. Vera nînan îtîfaqê bindestan esto. Îtîfaqê Cizîrî û Gezî esto. Ma bi israrî îtîfaqê demokrasîyî pawenê, rêxistin kenê û pîl kenê. Îtîfaqê demokrasîyî, îtîfaqê pêro şaranê bindestan û kesan o ke vurnayîş wazenê.

Ziwanê Ma yê Dayîke Rûmetê Ma Yo

Ziwanê ma yê dayîke rûmet, tarîx û ameyoxê ma yo. Ez tîya ra veng dana; Wa her kes bi ziwanê xo yê dayîke her cayê cuye de bi hawayêkê azadî qisey bikerê. Pirziwanîya ma temînatê demokrasîyî ya.

Vengdayîşê Seba Îtîfaqê Demokrasîyî

Ez tîya ra venga her kesî yo ke derheqê demokrasî, edalet, haştîya komelkî, kede de vatişêkê înan esto û pêro partîyan dana ke tewrê îtîfaqê demokrasîyî bibê. No vengdayîşê demokrasîyî û pêkerdişî zî yo. Berê ma bi îtîfaqê demokrasîyî Tirkîya rê berê demokrasîyî abikerê. Ma herinda îdareyê yew kesî de sîstemê demokratîkî xurt bikerê. Herinda edaletê serdestan de edaletê mazluman bîyarê ca.  Haştîya xo ya komelkîye bîyarê ca. Pîya Qanûnê Bingeyîn ê Demokratîkî awan bikerê. 

Faşîzm Cinîyan ra Terseno

Embazê min ê cinîyî yê ercayeyî; ma welat û dinya de rayberîya azadîye û demokrasîyî kenê. Ma bi têkoşînê xo yê hemparî bihêz ê, bihêvî yê.  18 serr ê ke îqtîdar dişmenîya cinîyan keno. Her roje cinîyî qetil benê, şîdetê bi înan yeno kerdene. No îqtîdar seba cinîyan koletîye wazeno. Înan sîstemê hemserekîye û destkewteyanê ma xo rê kenê hedef. Cinîyê sîyasetmedarî yenê tepiştene û sîyaset bêcinîye yeno veradayene. Çunke faşîzm cinîyan ra terseno. Hîşmendîya rastîye, têkoşînê hemparî û hêzê vurnayîşê cinîyan ra terseno.Ma do meydanan terk nêkerê. Ma do nêvinderê. Hemserekîye xeta ma ya mor a. Ma sey cinîyan her ke benê yew ê benê qels. Ma sey cinîyan bihêz bêrê û îqtîdar çin bikerê.Ma do Qanûnê Bingeyînî yê Cinîyan awan bikerê. Êyê ke cinîyan mehkumê tarîtîye kenê wa baş bizanê ke têkoşînê ma seserra 21. de bibo têkoşîn û serkewtişê cinîyan.

Ma do Destê Her Kesî Bitepişê

Ma do bi hîşmendîye têkoşîn bikerê. Kamca de kesêk sey bindest û çin bêro hesibnayene ma do uca de bibo. Ma xo biresnê her ca. Ma do destê her kesî bitepişê. Ma do HDP bikerê cayê bi mîlyonan. Ciwanê ercayeyî; ma bi ciwanîye dest pêkerd û ma bi ciwanîye ser bikewê.  Cinîyê ercayeyî do wisarê demokrasîyî bîyarê nê welatî. Şarê ma yo ercaye kedkarê têkoşînê azadîye yo. Ma do pîya vurnayîş bivisnê destî. Ma welatêkê azadî û demokratîkî awan bikerê ke tede kes vêşan nêmano, feqîr nêbo, xo nêkişo, cinîyî nêrê kiştene, kes fikranê xo ra semed nêro tepiştene.Ma do pîya ser bikewê. Demokrasî û haştîye do ser bikewê. Ez hêvîdar a ke kongreya ma do biba wesîleya haştîye û demokrasîyî.Ez nameyê partîya xo şima pêroyînan rê selam kena. Serkewtiş ê ma yo. Xizir hetkarê ma bibo.''