Hemserekê HDPyî Pervîne Buldan û Sezaî Temellî Hemvervatoxê HDKyî Îdîl Ugurlu, Sedat Şenoglu û Hemserekê KCDyî Bedran Ozturk û hemserekê partîye Beyoglu de endamanê çapemenîye reyde roniştî.

Buldane: Kongre do bi beşdarbîyayîşî pîlî û bi coşêkî bêra kerdene

Hemsereka Partîya Şaran ê Demokratîke (HDP) Pervîne Buldan bale ante tedaya vera HDPyî ser û vat: "Hedefê îqtîdarî HDP yo. Zaf embazê ma ameyî tepiştene. La ma payan ser o yê çunke ma şarê xo ra hêz gênê.

Ma pê bawer ê ke kongreya ma yê 23ê sibate bi hawayêkê coşî û bi beşdarbîyayîşêkê pîlî derbaz biba. Ma kongreya xo sey gamêka ke şina îqtîdarî vînenê. Paştdayîşê hêzanê demokrasîyî yê bi HDPyî mojnenê ke ma eşkenê pêro planê îqtîdarî çin bikerê. Weçînayîşê herêmî yê 31ê Adare de hedefê ma yo verên erşawitişê qeyûman û rojawanê Tirkîya de paştdayîşê hêzanê demokrasîyî bîyî. Ma înan de ser kewtî. Ma mojna her kesî ke hêzê HDPyî senîn o."

Buldane vist vîrî ke di serran de 5 hezar endam, xebatkar û îdarekarê HDPyî ameyî destbendkerdene û hezar kesî zî ameyî tepiştene. Buldane pare kerd ke qeyûman ra dima zî 25 hemşaredarî ameyî tepiştene û 32 qeyûmî herinda hemşaredaran de ameyî wezîfedarkerdene.

Temellî ra vengdayîşê îtîfaqî

Hemserekê Pêroyî yê HDPyî Sezaî Temellîyî da zaneyene ke ê prosesêkê tarîxî de kongreya xo kenê û vat: "Goreyê ma mesele bi demokrasî yena çarekerdene. Ma xebata kongreya xo de no çi da xo verî. 31ê adare de ma hêvîyêka newîye daye xo verî. Ganî komel bêro têhet û îtîfaq bêro awankerdene. Ma venga pêro kesan danê ke ma eşkenê binê îtîfaqê demokrasîyî de bêrê têhet. Kongreya ma vengdayîşêkê pîl a."

Hemvervatoxê HDKyî Sedat Şenogluyî zî beyan kerd ke îqtîdar nêverdano ke komel bibo aktîf û ê do seba naye kongreya HDPyî bi hawayêkê xurtî awan bikerê.

Hemserekê KCDyî Bedran Ozturkî zî pare kerd ke Tirkîya de mesela tewr pîlere dewaya kurdan a û na mesele bi polîtîkayanê ''asayîşperestan'' nêna çarekerdene. Ozturkî bale ante ser ke HDK û KCD do xo rêxistin bikerê û eşkera bikerê ke ê alternatîf ê.