Konferanso Pîl ê 3. ê HDPyî bi şîara ''HDPyo hîna bihêz, têkoşîno hîna bihêz'' Anqara de yeno kerdene.  600 delegeyî beşdarê konferansî bîyî. HDP netîceyanê konferansî 23ê sibate de kongreya xo ya 4. de do eşkera bikero.Hemsereka Pêroyî yê HDPyî Pervîne Buldan konferans de qisey kerd. Qiseykerdişê Buldane ra beşêk wina yo:

''Ma do prosesê verê ma de hedefanê pîlan bidê verê xo. Ma do serkewteyanê pîlan bivisnê destî. Îqtîdaro demokratîk do bibo hedefê ma yo tewr pîlêr.  Faşîzm nêvindeno o wext ma zî do nêvinderê. Ma do ecîz nêbê! Ma do gamêke apey nêerzê. Ma do têkoşînê xo hîna komelkî bikerê. Ya demokrasî yan zî faşîzm. Ya roşnîye yan zî tarîye. Ya azadîye yan zî esaret! Ya azadîya cinîyan yan zî serdestîya camêrdan! Hînî seba komelî wextê qerardayîş ame.Polîtîkaya sereke ya îqtîdarê AKP-MHPyî parçekerdiş, cakerdiş û tecrîd a. Bi nê hawayî keno ke îqtîdarê xo dewam bikero.

Hem teber de hem zî zere de naye kenê. Ê dekewtî Sûrîye, nika zî wazenê şorê Lîbya. Çi wext hêzê demokrasîyî bêrê têhet ê tersenê. Wexto ke cinîyî yenê pêser tersenê û seba ke na yewîya xera bikerê hêrişê cinîyan kenê. Bi qeyûman hêrişê sîstemê hemserekîye kenê ke yewîya îdareyê têduştî çin bikerê. Key elewîyî, karkerî bêrê pêser bibê yew hêrişê înan kenê. Semedo ke HDP îradeyê nasnameyan, şaran, bawerîyan, kulturan o û têna HDP eşkeno nê sîstemî bivurno hêrişê HDPyî kenê. 

Heta ke heqê ciwîyayîşê cinîyan nêro dayene cinîyî do her warê cuye de estbîyayîşê xo dewam bikerê. Heta ke ê kurdan rê zulmê qeyûmî bikerê kurdî sey Kawa vera qeyûman têkoşînê xo dewam bikerê. Cinîyî do qet sîstemê hemserekîye ra fek vera nêdê. Kurdî vera tedaya dewletanê neteweyan xîret bikerê ke yewîya neteweyî ya xo awan bikerê. Heta ke tecrîd do bêro xorinkerdene têkoşînê şarê ma yê vera tecrîdî zî do xorin bibo. Hêzê vurnayîş o tewr pîl ê nê prosesî HDP yo. Heta ke ê ma kêm bikerê ma do zêdêr bibê."