Serkêşîya Platformê Cinîyan ê Dêrsimî de vera xespkerdişê îradeyî rayraşîyayîşêk ame kerdene.  Rayraşîyayîş de pankarta sey ''Xoverdayîş dewam keno'', 'Jin, Jiyan, Azadî'' ameyî akerdene.

Hemsereka DBPyî Çîgdeme Kiliçgun Uçar, Serekwekîla Koma DEM Partî Gulistan Kiliç Koçyîgît û Hemşaredara Wanî Neslîhane Şedal zî tewrê rayraşîyayîşî bîyî. 

Gulîstane rayraşîyayîş de qisey kerd û vat: ''Şarê DÊrsimî tewirê Huseynî mojneno û vera Yezîdan payan ser de yo. Ma qetî gamêke nêeşte û do nêerzê. Şarê ma nobeta vera xespkerdişî de yo. Qeyûm Efendîyî zî dormeyê şaredarîye beton kerdo. Ma do vera qeyûman xo ver bidê û ser bikewê.

Dima cinîyan ver bi Meydanê Seyîd Rizayî rayraşîyayîş kerd.

Sîyasetmedare Sebahate Tuncel tîya de ard ziwan ke bi qeyûman ê kenê ke çimê şarî bitersnê. Sebahate vat: ''Ma wazenê ke bi nasname û ziwanê xo biciwîyê. Dêrsim şaristanê elewî, kurd û sosyalîstan o. Ma do sereyê xo nêarê war û cuyêka têdûşte, azade û demokratîke awan bikerê.''

Wekîla EMEPî Sevda Karaca îfade kerd ke “jin, jiyan, azadî” hêrsê înan ê û no hêrs zerrîya qeyûman bilerzno.

Hemsereka DADî Kadrîye Dogan pare kerd ke raştîye do mîyanê tarîtîye de nêmana û xoverdayoxî do ser bikewê.

Eşkerayîye bi Jin, Jiyan, Azadî qedîyaye.