Coşkûne: Heta girewtişê şaredarîyan do mucadeleyê ma dewam bikero

Parlamentera HDP’yî ya Wanî Şevîn Coşkûne xespkerdişê şaredarîyanê Amed, Wan û Mêrdînî sey qerarêkê sîyasîyî hesibna û va: ‘‘Heta girewtişê şaredarîyan do mucadeleyê ma dewam bikero.‘‘

Parlamentera HDP’yî ya Wanî  Şevîn Coşkûn a ke vera xespkerdişê şaredarîyanê bajaranê pîlan ê HDP’yî razînêbîyayîşê xo ramot bale atne polîtîkaya qeyûmî û hêrişê vera Kurdan ser.

Coşkûne vist vîrî ke mabênê serranê 2013-2015 de dimayo ke pêvînayîşê bi Rayberê Şarê Şarê Kurdî Abdullah Ocalanî ameyî vindarnayene 208 şaredarîyan ra 96’ê înan ameyî xespkerdene û va: ‘‘Hemşaredarê ma ameyî tepiştene, dezgehê cinîyan ameyî qefilnayene, bi hezaran îdarekarê partîya ma, hemserekî û parlamenterê ma hema zîndanan de yê. Weçînitişê 31’ê Adare de şarê ma wayîrê îradeyê xo vejîya û qeyûmî şawitî. AKP yo ke vînî kerd reyna 23’ê Hezîranî de weçînitiş newe kerd. Stratejemîya ma  Stenbol de binfînayîşê AKP bî û blokê AKP/MHP’yî Stenbol de bin kewt. Na rey reyna hêrişê şaredarîyanê ma kerd. Bi sebebo ke HDP Tirkîya de partîya kilît a, bi nê hêrişan wazênê qesas bigêrê.‘‘

Coşkûne wina dewam kerd: ‘‘Her kes dî ke heta rayê Kurdan nêrê girewtene kes nêeşkeno çîyêk bikero. Bi qerarêkê sîyasîyî nê hîrê şaredarîyê ma girewtî. Eke werte de bêhuqûqîyêk esta a zî ya qeyûmanê înan ê verînan a. Wa înan ra hesab bipersê. No qerarêko sîyasî û derbe yo. Hemşaredarê ma bi îradeyê şarî ameyî weçînayene, coka no qerarêko sîyasî yo.‘‘

Şevîn Coşkûne bale ante hêrişanê serê Wanî û qiseykerdişê xo wina qedîna: ‘‘Polîsan di rojî cuwa ver hêrişê rayraşîyayîşê ma kerd, tayî embazê ma ameyî destbendkerdene, tayî embazê ma birîndar bîyî û embazê parlamenterî ameyî derbkerdene. Îradeyê nê bajarî ameyo xespkerdene, xora şar vejîyeno kuçeyan û wayîr heqanê xo vejîyeno. Ma zi pîya bi şarê xo kuçeyan de na neheqîye anê ziwan. La tim ma raştê hêrişî yenê. Astengîye vejenê, hêriş kenê û vanê şar paştî şima nêdano. Heta ke wezîfeyê hîrê hemşaredaranê ma peyser merê îadekerdene do mucadeleyê ma dewam bikero.‘‘