Sereka ÎYÎ Partî Merale Akşener 18ê çeleyî de Sêwas de vatbi ke ''Verê cû zî cînayetê sîyasîyî est bîyî la nê cînayetî sey camêrdan ameyî kerdene.'' Vera qiseyanê Akşenere nêrazîbîyayîşî dewam kenê. 

Dadîyê ke seba destekê grevê vêşanîye yê tepişteyan Nobeta Edaletî de yê, înan derheqê babete de ANFyî rê qisey kerd.

Dayîke Afîfe Kartala ke domanê ci tepişte yê vat: ''Ma kiştoxan hol şinasnenê. Nê kiştoxî qetî do kurdan rê dost nêbê.  Ez her keso ke hetê Akşenere de yo şermezar kena. Kurdê ke endamê partîya aye yê wa xo ra bişermê. Serranê 90an de înan kurdî qetil kerdî. Akşenere ewro wesfê ê qetilkerdişan dana. Ma do qetilkerdişan û dişmenîya înan de sereyê xo nêarê war.''

Dayîke Lahîye Avşîmet îfade kerd ke Akşenere dişmena kurdan a û vat: ''Dişmenê babî û pîrikanê ma, dostê domananê ma nêbenê. Wextê weçînayîşan de ê vejîyenê werte û vanê 'Ma dostê kurdan ê.' La weçînayîşan ra pey zî vanê 'Kurdî çin ê.' Ganî kurdî nê dişmenanê xo hol bişinasnê. Ma hînî nêwazenê ke erdê ma bi gonîya kurdan hît bibo. Ma teyna wazenê ke wa tecrîd biqedo.''