Hemserekanê Pêroyî yê Partîya Demokrasîyî û Têdûştîye ya Şaran (DEM Partî) Tulaye Hatimogullari û Tuncer Bakirhanî verê  Heyetê Weçînayîşî yê Berzî (YSK) de derheqê derbeya AKPyî ya vera îradeyê şarê Wanî de eşkerayîye daye.

Bakirhanî vat: ''Na derbeya sîyasîye ya. Darbe verî bi destê qeyûman ameyêne kerdene, inkey bi destê hukmî û qanûnî yeno kerdene. Ma do destûr medê ke ê bi nê kayan îradeyê şarê Wanî çarçur bikerê. Serekkomarî hema vizêr vatêne ê do îradeyê şarî rê, netîceyanê sindoqan rê hurmet bikerê. Di rojan de sebi, çi bedilîya?  

Vera na darbe heme kurdî û şarê Tirkîya do bêveng memanê. Ma na darbe qetî qebûl nêkenê. Vera na bêhuqûqîye ma semedê paştdayîşî veng danê. Na têna meseleya DEM Partî nîya. Tirkîya de meseleya her kesî ya ke wayîrê anor û wîjdanî yo û demokrasî wazeno. Ma veng danê heme partîyanê sîyasîyan, rêxistinanê demokratîkî û heme kesanê hîsdaran ke wa vera darbeya sîyasîye paştî bidê şarê Wanî, paştî bidê DEM Partî. Ma do semedê wedaritişê na bêhuqûqîye têkoşînê xo bidomnê.''

Tulaye Hatimogullari zî vat: ''Ma na bêhuqûqîye mumkun nîyo nîna qebulkerdene. Ma do çirey qebul mekerê. Na darbeya sîyasîye ya. Şarê wanî, şarê kurdî, şarê Tirkîya û hêzê demokrasîyî do destûrê ci medê. Ma do pêro pîya vera na darbeya sîyasîye vinderê. Îqtîdar seba ke bin kewt eke wazeno qesasê ci DEM Partî ra bîgêro, zaf xelitîyeno. Wa cade nê qerarî ra peyser agêro. Ma veng danê hêzanê demokrasîyî yê Tirkîya ke wa paştî bidê şarê Wanî.''