Wezîrîya Weşîye  dabi zanayene ke Dêrsim hewteyanê verênan ê teşrîna peyêne de mîyanê bajaranê ke tede waqayê Korona tewr zaf estê de cayê xo girewt. Goreyê doneyan şaristan de her 100 hezar kesan ra 44 kesî pê Korona kewenê. Şaristan de servîsê ciewnîyayîşê giranî yê nêweşxaneyan se ra 90 pirr ê.

Dokroranê Mudirîya Weşîye ra Zerrîne Şahînkola ke çapemenîya herême ra qisey kerd ard ziwan ke înan servîsyo diyîn ê Korona akerdo û vat: ''Semedo ke merdimî mekanan de bêtedbîrê mesafeyê komelkî nişenê ro û goreyê tedbîrê maske tênêgêrenê hûmara waqayan vera zêdîyena. Menganê verênan de roje de 10-15 waqayî dîyayêne nika na hûmara roje de 40-50 waqa yê. Êyê ke servîsê ciewnayîşê giranî de yê ya derzîn nêbîyê yan zî derzînê înan tam nîyê. Mergî goreyê waqayan zêde nîyê. Merdimê ke derzîne bîyê bi rehetî têgêrenê la merdîmê derzînkerdeyî zî eşkenê bibê nêweş. Wa her kes derzînanê xo tam bikerê û goreyê tedbîran têbigêro.''

Dêrsim de mîqtarê pirodayîşê derzînê Korona  se ra 76,5 o. Walîtîya Dêrsimî zî da zanayene ke şaristan de mîqtarê derzînpirodayîşî kêmîyayo.

Goreyê doneyanê peyênan ê ke Wezîrîya Weşîye rojane pare kena, Kurdîstan û Tirkîya de 24 saetanê peyênan de 195 kesan rîyê janê Korona ra dinyaya xo bedilnaye û 21 hezar 117 waqayê neweyî ameyî tespîtkerdene. Bajarê ke tewr tay derzîne ameye pirodayene zî wina ameyî rêzkerdene: Riha, Êlih, Amed, Sêrt, Mûş, Çewlîg, Mêrdîn, Bedlîs, Agirî û Bayburt.