Destekê seba Nobetanê Edaleyî pîl beno ke çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de dîyabî destpêkerdene. Keyeyê ke tewrê Nobeta Edaletî ya Wanî bîyê, înan ANFyî rê qisey kerd.

Mehmet Nûr Çîçekî ard ziwan ke domanê ci grevê vêşanîye de yo û vat: ''Ma na çalakîya dadîyan ercîyaye vînenê. Tecrîd sûcê vera merdimatîye yo. Qanûnî ganî seba her kesî seyci bê. Ma zanenê ke ê 'haştîye' ra tersenê û goreyê polîtîkaya înkar û îmha têgêrenê. Eke vengê Birêz Abdullah Ocalanî bêro eşnawitene haştîye do bêra welatî. Ê seba ke ney ra tersenê tecrîdê Îmraliyî anê ca. Ma sey keyeyanê tepişteyan paştî danê çalakîya înan a grevê vêşanîye. Heta ke tecrîd biqedo û zîndanan de zulm biqedo ma do paştî bidê na çalakîya ercîyaye.''

Saîme Gurbuza ke bi armancê destekê Mayanê Haştîye Nobeta Edaletî de ya vat: ''Ez selamanê xo pêro dadîyan ra şawena. Nê wextî de ganî her kes paştî bido grevê vêşanîye. Zîndanan de zulm û tecrîd est ê. Seba haştîye ma do tim hetê Mayanê Haştîye de yê. Ma venga pêro dadîyan danê ke wa paştî bidê Nobetanê Edaletî.''

Xanime Varli vat: ''Şima vanê ke edaletê Homayî anê ca, camîyan virazenê, rojeyî gênê, nimaj kenê. O çax şima çira edaletê Homayî nêanê ca. Ganî şima goreyê Quran û Îslamîyetî têbigêrê. Seba ke nê welatî de edalet çin o domanê ma grevê vêşanîye de yê. Şima se kenê bikerê ma do tim est bê. Ma tim heqanê xo bipawê û haştîye biwazê.''

Abdurrahman Ekîncîyî vat: ''Lajê mi tepişte yo û cezaya zîndanî ya 570 serran dîyaya ci. Ma wazenê ke wa tecrîd biqedo. Coka ma Nobeta Edaletî de yê. Lajê mi telefon de mi rê vat 'Eke şarê ma hetê ma de nêvindero, ma do bimirê.' Coka tecrîdê vera Abdullah Ocalanî û tepişteyan ganî wedarîyo.''