Denîze Poyraza ke 17ê hezîrana 2021î de hêrişê vera Rêxistina HDPyî ya Îzmîrî de amebî qetilkerdene, vizêr roniştişê çarin ê dewaya ci Mehkemeya Cezaya Girane ya 6. ya Îzmîrî de ame kerdene. Pîya bi merdimanê Poyraze xelêk avûkat û kesanê bînan dewa teqîp kerde.

Serekê Baroyê Îzmîrî Ozkan Yucel derheqê Gamze Açarî de persa la kiştox Gencerî cewabê ci nêda. Yucelî vist vîrî ke kiştoxê ke perwerdeyo leşkerî girewto destê xo têşayî û verê polîsan de kewt banê HDPyî û qirkerdiş kerd û vat paştî dîyaye ci ke û wina rehet têgêreno. Badê persanê avûkatanê dewa şahîdî ameyî goştarîkerdene. Şahîdan ra Hacay Yilmaz ard ziwan ke polîsan rixmo ke vengê çeke eşnawit vindetê heta ke kiştoxî gureyê xo qedîna.

Kiştox Gencer ewnîya avûkatanê xo û destê xo berd qirrika xo. Naye ser o avûkatan waşt wa na rewşe zelal bikero, wazeno se vejo. Heyete ra vengê nêrazîbîyayîşî bîyî berz û des deqeyî mabên dîya roniştişî.

Avûkate Turkan Aslan Agaş vat: ''Ma wazenê wa na mesele bêro zelalkerdene. Ma wazenê wa pêro şahîdî bêro goştarîkerdene. İbrahim Akil, Dogukan Çetin, Oytun Yuksel, Ogulcan Dinçsever, Gamze Açar yê ke semedê dosya kesê krîtîk ê ma hema înan rê persî pers nêkerdî. Wa nê kesî bi sîstemê SEGBİSî tewrê mehkeme bibê.''

Agaç semedê safîkerdişê mesele sey meteryalê dîjîtal û qeydê kamera 49 waştişî sey nuştekî teqîdîme mehkeme kerdî. Serekê Baroyê Mûşî Kadîr Karaçelîk û Serekê Baroyê Wanî Zulkug Uçar zî waşt wa mehkeme wezîfeyê xo bîyaro ca û hetanê tarîyan ê mesele vejo werte.

Heyetê mehkeme waştişê avûkatan ê meteryalanê dîjîtalan û qeydanê kamera red kerdî û roniştiş 12ê teşrîna verêne ya 2022yî rê peyde eşt.