Seba ke Konseya Ewropa PKK girewt lîsteya rêxistinanê terorî vera nê dewa amebî akerdene. Dîwanê Edaletî yê Ewropa ke Luksemburg de yo de roniştişê dewa ame kerdene.

Dîwanê Edaletî de pêro pîya derheqê PKKyî hîrê dewayî yenê dîyene.  Dîwanî mabênê 2014 û 2017î de lîsteyî betal kerdî, Konseya Ewropa vera qerarî îtîraz kerdbi.  2018 û 2020 de PKKyî vera qerarî  dewa akerde. Mehkeme wird dewayî kerdî yew.  Roniştişo verên 31ê adare de amebi kerdene.

Avûkata hollandayije Tamara Buruma ke PKKyî temsîl kena bombardumanê dewleta tirke vîstî vîrî û vat PKK sîvîlan hedef nêgeno têna semedê xopawitiş cewab dano leşekan. Buruma seba ke nê çalakîyî hetê Konseya Ewropa ra sey çalakîya terorî yenê destgirewtene nêrazîbîyayîş mojna û vat seba ke PKK lîste de yo multecîyê sîyasîyî yê kurdî zî raştê zextî yenê. Avûkate Buruma ard ziwan ke argumanê mehkeme pêro kahan ê û vat: ''PKKyê çalakîyanê terorî nêkeno, rayîranê fermîyan şuxulneno. Coka ganî na lîste ra cade bêro vetene.''

Konseya Ewropa pawitişê xo de tay çalakîyê PKKyî yê verênî reyna ardî ziwan ke hema heme pêro vera hedefanê leşkerîyan ameyî kerdene.

Mehkeme roniştiş qedîna û eşkera nêkerd ke netîce do çiwext bewlî bibo.