Dîwanê Edaletî yê Luksenburgî de roniştişê dewaya PKKyî ame kerdene ke dewa heşt serrî yo dewam kena. Hetêkê dewa Yewîya Ewropa, Konseya Ewropa û Komîsyonê Ewropa hetê ci yo bîn zî PKK yo. Dewa seba ke PKK lîsteya terorî ra vejîyo ameybî akerdene.

Dîwanê Edaletî yê Yewîya Ewropa ke Luksemburg de ya 2018 qerar girewtbi ke ganî PKK lîsteya terorî bêro vetene la Yewîya Ewropa qerar temyîz kerdbi. Dima ra cade 2019 de Îngilîstanî reyna muracat kerdbi ke wa PKK lîste de bimano û bi eynî argumanan reyna gerîyabi lîste. Hetê kurdan zî cade vera lîsteya newî dewa akerdbî.

Dewaya ke ewro Luksemburg de ameye kerdene de qerarê temyîzî yê Yewîya Ewropa û dewaya PKKyî ya vera qedexeyî bîyî yew. Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydar zî dewa teqîp kerd.

Avûkatanê PKKyî ard ziwan ke ganî mesele têna çarçewaya çalakîya leşkerîye ra nêro dest girewtene û vat PKK hetê sîyasîyî, komelkî û ekonomîkî ra rêxitinkerde yo armancê ci estê. Heyetê mehkeme têkoşînê PKKyî çarçewaya qederê xo tayînkerdişî de girewt dest muneqaşe dahîna hîra kerd. Avukata PKKyî  Tamara Bruma vat seba ke Neteweyê Yewbîyayeyî (NY) derheqê qederê xo tayînkerdişî yê kurdan de qerarêk nêgirewt, no nîno na mana ke no heqê kurdan çîn o. Dadgerî heq da nê tesbîtî.

Dadgeranê Dîwanê Edaletî yê Ewropa vengdayîşê çareserî yê Rayberê Şarê Kurdî Abdullah Ocalanî vist vîrî û Konseya Ewropa rê pers kerd ke înan qey gama ke PKK girewt lîste şertê ke bedilîyayî nêgirewtî dest.Dadgerî mesajê haştîye yê Rayberê Şarê kurdî Abdullah Ocalanî yê 2019î vist vîrî û Konseya Ewropa rê persa ê na babete senî fikiryenî.Konseya Ewropa îdîa kerd ke PKK zaf rey adirbirnayîş îlan kerd û dima binpay kerd û vat ê eşkerayîyanê Abdullah Ocalanî analîz kenê la no qîm nêkeno. Heyetê mehkeme dewa qedîna û vat ê do tarîxê qerarê cuwa pê hetan rê bidê eşnawitene.