Endamê Meclîsê Partîye yê HDPyî Avûkat Dogan Erbaşî derheqê îtîrafanê Sedat Pekerî de ANFyî rê qisey kerd.

Erbaşî bale ante ser ke rixmo ke medyaya îqtîdarî serê ci gêna nê îtîrafî rojdem de yê û vat: ''Ma sey dormeyanê muxalîfan cara qala ci kerdêne ke dewlete pê hemkarîya çete û mafyayan vera muxalîfan û kurdan têgêrena û sey kontragerîla, JÎTEM, OHAL û vêşnayîşê dewan tay kerdişan ana ca. No kes (Peker) zereyê îqtîdarî ra qisey keno, îtîrafan keno coka vateyê ci girîng ê. Ma pîsîyanê îqtîdarî sey çekdayîşê El Nûsra, Sûrîye de polîtîkayanê Tirkîya nika seyr kenê. Eşkera bi ke nê şerê vera çareserîya meseleya kurdan de dewlete seba ke çete û mafyayan fînanse bikera bazirganîya kondoxî kena.''

Erbaşî vist vîrî ke Îtîhat û Terakkî ra nata dewlete na çeteyan xebitnena û vat: ''Awanîya taybete ya Îtîhat û Terakkî Teşkîlat-i Mahsusa hêzo paramîlîter ê dewlete bi. Dima NATOyî reyde gladioyî ronîyayî. Dima nê awanîyan bi nameyê Dayîrê Şerê Taybetî û JÎTEM dewam kerd. Sûcê ke 1980an ra nata Kurdîstan de yenê kerdene hetê înan ra ameyî caardene.''

Erbaşî îfade kerd ke Rayberê Şarê Kurdî Abdullah Ocalanî tim dewlete û şar derheqê nê çeteyan, paramîlîteran de şîyar kerdî û vat: ''Birêz Ocalanî tim ardêne ziwan ke ganî dewlete demokratîk biba. Bi taybetî ercnayîşanê ci yê 90an qala çetebîyayîşî, çinkerdişê huqûqî kerdêne. Goreyê Birêz Ocalanî sebebê ney zî o bi ke meseleya kurdan de polîtîkaya înkar-îmha ameyêne şuxilnayene. Yanî semedo ke meseleya kurdan de neçareserîye dewam kerdêne  nê awanîyan zî dewam kerdêne.''

Erbaşî da zanayene ke ganî zemîno sîyasal ê nê çetebîyayîşî bêro dîyene û vat: ''Heta ke raştîya nê şerî nêra dîyene ma nêeşkenê kokê nê têkilîyan fam bikerê. Abdullah Ocalanî 2013-2015 de xerîtaya rayîrî û xeylêk pêşnîyazî pêşkêş kerdî û eşkera kerd ke na mesele senî çareser bena. La nika destûr nêdîyeno ke o avûkatanê xo bivîno. Îradeyo ke şer û neçareserîye de israr keno tecrîdî dano dewamkerdene. No nêzdîbîyayîş  rayîr dano nê paramîlîteran û mafyayan. Eke tecrîd biqedo şer zî qedîyeno, çareserîya demokratîke zî aver şina. La eke tecrîd dewam bikero nê awanîyê antîdemokratîkî zî dewam kenê.''