Hûmara kesanê ke erdlerzê bi şîdetê 6,8 yê qezaya Sîvrîce ya Xarpêtî de wefat kerd vera zêdîyena.

AFADî derheqê babete de eşkerayîyêke daye û da zanayene ke Xarpêt û Meletî de hûmara mergan bîye 31 û 45 kesî zî binê xirbeyan ra ameyî xelisnayene. Xarpêt, Meletî, Gumgum, Amed, Riha, Semsûr û Êlih de zî 607 kesî erdlerz de birîndar bîyî.

Erdlerzî ra dima 599 hebî erdlerzê qijkekî ameyî meydan.

Eşkerayîya AFADî de nê zanayîşî ameyî dayene:

72 bînayî rijîyayî

514 bînayan bi giranî xesar dî

409 bînayî zî tay xesar dî

Heyetê HDPyî mexdurî zîyaret kerdî

Wekîlanê HDPyî Ayşe Acar Başaran, Şevîn Coşkun, Erdal Aydemîr û Hemhetkarê Hemserekan Salîm Kaplanî zî tede heyetê HDPyî Xarpêt de mexdurê erdlerzî zîyaret kerdî.

Heyetî dima Cemxaneyê Yildizî û Cemxaneyê Ehlîbeytî yê ke şar tîya de ame pêser zîyaret kerd.

Heyetê HDPyî da zanayene ke 27 şaredarîyî amade yê ke hetkarîya mexduranê erdlerzî bikerê û siba ra tepîya seba ke hewcedarîyî bêrê peydakerdene ê do bixebitê.

Heyetê HDPyî do birîndaran, herêmanê erdlerzî û kesanê ke merdimanê înan wefat kerd zîyaret bikerê û cigêrayîş bikerê.

Erdogan kesê ke qala mexduran kenê hedef kerdî

Serekê Pêroyî yê AKPyî û Serekkomarê Tirkîya Recep Tayyîp Erdoganî verî ke şoro Cezayîr Meydanê Teyarayan ê Îstanbulî de eşkerayîyêke daye. Erdoganî derheqê erdlerzê Xarpêtî de qisey kerd û kesê ke kêmasîyanê îqtîdarî rexne kenê hedef kerdî.

Erdoganî kesê ke mexduranê erlerzan ra behs kenê hedef kerdî û vat: "Medyaya komelkî ser o tay mesajî estê ke çew pê qayîl nîyo."

Dewlete hetkarîya ma nêkerde

Meletijî seba ke keyeyê înan bixesar ê nêşinê keyeyanê xo. Taxa Gundegerî ya qezaya Puturge ya Meletî de heta nika hetkarîyêke nêresaye. Mexdurê erdlerzî 2 şewan ra nata teberî de û weayîtan de kewenê ra.

Muxtar Selahattîn Yildirimî vat: "Dewlete heta nika ma rê hetkarîye nêkerde'' Yildirmî îfade kerd ke heta nika Welîyê Meletî, Şaredarê Meletî, wekîlanê AKPyî û MHPyî soz da ke mexduran rê xeyman bierşawê la kesêkî zî xeyme nêerşawite.

Eşkerayîya YE

Vervatoxa Sekreterîya Pêroyî ya Yewîya Ewropa (YE) Stephane Dujarric derheqê erdlerzê Xarpêtî de eşkerayîyêke kerde. Dujarrice ard ziwan ke Sekretero Pêroyî Antonio Goterres seba erdlerzê Xarpêtî xemgîn o û keyeyanê kesanê ke wefat kerdî rê serweşîye wazeno. Dujarrice eşkera kerd ke YE amade ya hetkarîye bikera.