Yewşeme do rayberîya Hukmatê Almanyaya Federale yo ke serewezîrîya ci Angela Merkel kena de bi armancê qedînayîşê şerê zereyî yê Lîbya konferansêk bêro kerdene. DYA, Rûsya, Çîn, Îngilîstan, Fransa, Îtalya, Misir, Emîrîyanê Ereban ê Yewbîyayeyan û Cezayîr ra lîderî do beşdarê konferansî bibê. Merkele venga Serekkomarê Tirkîya Erdoganî zî da.

Serekwezîrê Hukmatê Yewîya Neteweyîye yê Lîbya Fayîz Es Sarac û General Halîfe Hafter zî do beşdarê konferansî bibê.Sekretero Pêroyî yê Neteweyanê Yewbîyayeyan Antonî Guterres û Yewîya Ewropa û Yewîya Ereban ra zî nameyê payeberzî do beşdarê konferansî bibê.

''Sucdarê şerî çita heq bikerê ma do o tewir şorê verê înan''

Seba ke lîsteya dawetbîyayeyan de Erdogan zî esto muxalefetê Almanya nêrazîbîyayîşê xo mojna. RiseUp4Rojava(Seba Rojawanî Sere Wedarê!) yo ke tede zaf organîzasyon û dezgehî estê seba ke Erdogan do bêro Berlin çalakîyêka girseyîye amade kenê.

Yewşeme saete 10:00 de wexto ke Erdogan bireso Berlin mabênê bînaya Serekwezîrîye û Meclîsê Federalî de çalakîye do bêra kerdene. #RiseUp4Rojava pare kerd ke sere de hêrişê vera Rojawanî pêro sucê şerî yê Erdoganî eşkera kerdî û îfade kerd ke verê sucdaranê şerî senî bêro têgêrayene verê Erdoganî zî bi heman hawayî do bêro têgêrayene.

#RiseUp4Rojava seba ke Erdogan konferansêkê winasênî rê ame dawetkerdeneAlmanya şermezar kerde û no vengdayîş kerd: "Bi fermanê Erdoganî cergan erşawenê Sûrîye, no dawet hewesê Erdoganî yo ke bibo hêzê superî do zêde bikero."