Pawitox û merdimanê Endamê Heyetê Rayberdişî yê Merkezî û Wekîlê AKPyî Halîl Îbrahîm Yildizî keyeyê Şenyaşarî ra 3 tenî kiştîbî. Nobeta edaletî ya keyeyê Şenyaşarî 101 rojî yo dewam kena. Ferît Şenyaşar zî dadîya xo Emîne Şenyaşar reyde her roje verê Edlîyeya Riha de nobeta edaletî gêno. Nê 101 rojan de dadî û laj xeylêk reyî ameyî destbendkerdene, maruzê hêrişan mendî. Çend reyî Ferît Şenyaşar û dadîya ci wedarîyayî nêweşxane.

Ferît Şenyaşarî qala sebebê nobeta edaletî kerde û bale ante ser ke ê xêrê zîyaretan ra payan ser o yê. Ferît Şenyaşarî îfade kerd ke verê çimanê her kesî de babî û birayê ci kişîyayî, pêro selahîyetdarê dewlete ney zanenê û kiştoxan nimnenê.

Ferît Şenyaşarî da zanayene ke 3 serrî yo ê seba edaletî têkoşîn kenê û vat: ''Ewro ma verê Edlîyeya Riha de têkoşînê xo dewam kenê. Ma bêedaletîye ra semed tîya de yê. Çunke werte de qirkerdiş û sûcêk esto. La muxatabê mi çin o. Birayê mi û babîyê mi Nêweşxaneyê Dewlete yê Pirsûsî de verê kamerayan de ameyî kiştene. Babîyê mi verê çimanê dadîya mi de kişîya. Bedenê birayêkê mi de 17 guleyî, bedenê ê bînî de 20 guleyî estbîyî. No hêriş nêweşxane de ame kerdene. La nê çîyî dosya de ca nêgênê.

Kiştoxî Riha û Pirsûs de gêrenê. Dadîya mi 65 serre ya la her roje şina verê edlîye. Ma do nobeta xo rê dewam bikerê. Her kes nika dewa teqîb keno la warê huqûqî de averşîyayîşêk çin o. Polîsan tim ma rê teda kerde, ma eştî nezaret, zîyaretgerê ma asteng kerdî. Înan waşt vengê ma bibirnê. La ma serê bira xo de yê. Ma do edalet bîyarê ca û heta peynî xo ver bidê.''