Tepişteyê dewaya PKK û PAJKî 27ê teşrîna peyêne ra nata vera tecrîdkerdişê Rayberê Şarê Kurdî Abdullah Ocalanî û binpaykerdişanê heqanê xo grevê vêşanîye de yê. Hemsereka Federasyonê Komeleyanê Paştdayîşê Huqûqî yê bi Keyeyanê Tepişteyan û Hukmwerdeyan ê Mezopotamya (MED TUHAD-FED) Elîfe Haran ANFyî rê qisey kerd û ard ziwan ke bi rewşa îstîsnayî binpaykerdişê heqanê merdiman mende bîyî; bi taybetî serra peyêne de binê nameyê tedbîranê vîrusî de binpaykerdişî zêdîyayî.

Elîfe Haran vist vîrî ke pêvînayîşo peyên netîceya grevê vêşanîye yê 200 rojî de ame kerdene û vat: ''Naye ra dima tepişteyan ra qesas ame girewtene. Tecrîdê vera Birêz Ocalanî dewam kerd. Tewr peyên 27ê teşrîna peyêne de grevê vêşanîye dest pêkerd. Na çalakîye ganî sey netîceya tecrîdê Îmraliyî bêra dîyene. Bi taybetî jan û grevê vêşanîye ra qesawet di qatî zêdîyayî. Na rewşe seba tepişteyan rîsk a.''

Elîfe Haran pare kerd ke waştişê tepişteyan meşrû û heqdar ê û vat: ''Sere de Wezaretê Edaletî wezîfeyê îdareyanê zîndanan o ke heqê cuye û weşîye yê tepişteyan bipawê. Nê dezgehî bi hawayêkê bêhîsgerî nêzdîyê grevê vêşanîye benê. Heman wextî de zîndanan de aktîvîteyê sey spor, hobî zî qedexe yê. Wexto ke tepişteyî şinê nêweşxane 14 rojî binê karantîna de yenê vindarnayene. Bi nê hawayî ê tecrîd benê. Tim gardîyanî erzenê koxuşan ser, cezaya dîsîplînî dîyena tepişteyanê grevê vêşanîye û ê hucreyê yewkesî de tepişîyenê. Keyeyê tepişteyan zaf qerqilîyenê la paştî danê waştişanê meşrûyan ê tûtanê xo.''

Elîfe Harran bale ante bêvengîya vera grevê vêşanîye ser û vat: ''Ma hê binê tesîrê janî de yê. Bêguman rojdemê rêxistinanê komelê sivîlî, hêzanê demokratîkan, keyeyan û dezgehanê bînan de grevê vêşanîye esto. La senî ke dezgehê dewlete jan vera tepişteyan vurnenê firsend teber de zî rewşêka winasêne esta. Bi taybetî Wan û Amed de 15 rojan de yew çalakî û aktîvîteyî yenê qedexekerdene. Pê destbendkerdiş û tepiştişî dezgehî yenê vengkerdene. Rixmê nînan zî ganî ma bibê vengê tepişteyan û ma na bêvengîye bivurnê qîrayîş.''