Hêriş û astengîyê vera ziwan û kulturê kurdan dewam kenê.  Verî konserê Merkezê Kulturî yê Mezopotamya (MKM) ame betalkerdene, Şaredarîya Keçîorenî ya Anqara konserê Mem Araratî betal kerd, zîndanan ra kitabê kurdkî bi bahaneya 'qedexe yê' arê dîyayî. 

Îdarekarê Komeleya Nuştoxan a Mezopotamya (MYD) Bahadîn Robarî derheqê babete de Ajansê Mezopotamya rê qisey kerd.

Robarî vist vîrî ke Zîndanê Bandirma de  dest nîya kitabê ci 'Antolojîya Dengbêjên Botanê' ser û vat: ''Kitab de cuyê 70 dengbêjanê Botanî yenê qalkerdene. Ma pêrop destûrî girewtbî û kitab wina çap kerdbi. No kerdiş bi temamî dişmenîya vera kurdkî ya. Ge ge sîyasetmedaranê sey Erdoganî semedê menfaatanê xo kurdkî şuxilnaye. Nînan seba ke komel bixapînê no kerd. Înan kitabê Ehmedê Xanîyî çap kerdî la wexto ke ma çap kerdî tira ameyî muhakemekerdene. No zî rîyê înan ê raştikênî eşkera keno.Nika hukmat cara binî ra dişmenîya kurdan keno coka pêro çîyanê kurdkî qedexe kenê. Nê qedexeyî raşta raşte vera kurdayetî yê.''

Robarî îfade kerd ke tek armancê hukmat û dewlete asîmîlekerdişê kurdan o û vat: ''Eke ma ziwanê xo vîr a bikerê ma benê xerîb. Ma benê xerîbê ziwan, kultur û welatê xo û wextêkî ra pey ma benê dişmenê xo. Coka ganî ma zêdêr wayîrê ziwanê xo vejîyê, bi ziwanê xo qisey bikerê. Ganî ma ziwanê xo bimusnê domananê xo û mîyanê komelî de ney aver berê.''