Hemserekê HDP’yî yê Amedî Zeyyat Ceylanî hêrişê îşxalî yê dewleta Tirkî yê vera Başûrê Kurdistanî û paştdayîşê hukmatê Başûrî ercna.

Ceylanî vist vîrî ke dewleta îşxalkare seba ke Kurdî heq dest mefînê hêrişê her hetî kena û va: ‘’Dewleta Tirkî herra bimbareke ya  Kurdistanî sey herra xo vînena û na çarçewe de hêrişê destkewteyanê Kurdan kena.Tirkîya wazena ke Sûrîy, îdlîb û Haleb de bi rayîrê çeteyanê OSO îdareyê herême kontrol bikero. Kişta naye de wazena ke xeta Mûsûl, Kerkuk û Şengalî bigêrê binê kontrolê xo. Planê Tirkîya ya ke bi operasyonê Xakukê destpêkerd zaf hîra ya. Bi nê operasyonî wazena ke Îran û Iraq bîgêro kişta xo û hêrişê Kurdan bikero.

4 Parçeyê Kurdistan zî Hedefê Tirkîya de Yê

Ceylanî bale ante ke hedefê AKP’yî de çareserîye çîn a û va: ‘’Rixmê heme hewldayîşê Rayberê Şarê Kurdî Abdullah Ocalanî yê çareserîye îqtîdar şerî de israr keno. Dewleta Tirkî bi kayan û metodanê qijan wazenê ke Kurdan bixapîno. Nê kayê înan ser nêkewtî. Coka reyna şîdet fîna dewre. 4 serrî yo ke nê hêrişî dewam kenê. Hêrişê Vakurî çirey nêvindetî. Serkewtişê Rojawanî ra dima hêrişê Rojawanî kerd. Ewro zî hêrişê Başûrî kenê. Operasyonê Xakurkê ke operasyonêko normal nêyo. Tirkîya wazena ke yewîya Kurdan rê mudaxele bikero. Wazena ke mabenê çar parçayanê  Kurdistan de pêkewtiş vejîyo û şerê wayeûbirayî bêro destpêkerdene. Dimayê Kerkuk û Efrînî wazena ke Başûrî îşxal bikero. Tîya  wezîfeyêko gird keweno PDK, YNK, Têgêrayîşê Goranî û Komala Îslamî. Ganî mekewê dama Tirkîya.

Bi Mesajêkê Ocalanî Huzur Yeno

Ceylanî bale ante serê Rolê Rayberê Şarê Kurdî Abdulla Ocalanî ser û best pa: ‘’Tirîya ganî naye hol fam bikero ke Ocalan semedê şarê Kurdî wayîrê ercê girdî yo, rolê ci zaf muhîm o. Xora dewlete pratîk de zî  no dî û qebûl kerd ke Birêz Ocalan Rayberê Kurdan o û tesîrê ci Kurdan ser esto. Gama ke Birêz Ocalan dewre ra vejîyeno kaos dest pêkeno. Tena mesajêkê Birêz Ocalanî huzur ano welat. Şarê Kurdî qal û mesajê Birêz Ocalanî paweno. Ocalan 40 serrî yo semedê huzur û haştîye welatî mucadele keno. Bi serran o ke vano ez eşkena şerî werte ra wedarî. Ganî dewlete goş bidê ey û semedê çareserîye bikewo dewre.

Wa Ambargoyê Mexmûrî Bêro Wedartene

Ceylanî vera amabargoyê serê  Mexmûrî zî hêrsê xo ard ziwan û qiseykerdişê xo wîna qedîna:’’ Şarê ma yê Kampa Mexmûrî serr a 1994’î de zextanê Tirkîya ra rema şi ûca. Şarê Mexmûrî zoradarîya tewr girde yê Kurdistanî ante. Ma Amed ra înan rê silam û hurmetê şawenê û xoverdayîşê înan pîroz kenê. Nêzdîyê 20 rojî yo Mexmûr ser o ambargo esto û kampe binê ablûqa de ya. Berpirsîyarê naye Neteweyê Yewbîyayeyî (NY)  û hukmatê Iraq ê. Tirkîya kampe bombardûman kerde û sivîlî qetil kerdî. Wa NY wezîfeyê xo bica bîyaro. Iraq ganî bêvengîya xo bixeripno û wayîrê şarî bivejîyo. Eke PDK û YNK vanê ma wayeûbiraye wa herinda ambargoyî de wayeûbirayîya xo ramojnê. Rîyê ambargoyî ra 2 cinîyan dergûşê xo vînî kerdî. Ganî ambargo cade bêro wedartene.’’