Vervatoxa HDPyî Ebru Gunay merkezê pêroyî yê partîya xo de pê kombîyayîşê çapemenîye rojdem ercna. Qiseykerdişê Gunaye ra beşêk wina yo:

''Tirkîya de hema zî tesîrê Darbeya 27ê Gulane dewam kenê; qeyûmî yenê tayînkerdene, sîyasetmedarî tepişîyenê, ciwanan rê îşkence yenê kerdene. Çete û mafyayî bîyê hemkarê îqtîdarî heta bîyê wayîrê îqtîdarî.

Birêz Abdullah Ocalanî şîyar kerdbi ke eke çareserîya demokratîke nêra caardene darbe do bêra kerdene. Ewro mekanîzmaya darbe welat îdare kena. Ney ra xelisîyayîş zî pê averberdişê têkoşînê demokrasî beno.

Ewro çeteyê ke babeta meseleya kurdan de benê yew la vilakerdişê dewlete de kewenê pê rîyê înan vejîyeno werte. Pê dişmenîya vera kurdan nê çeteyî têkilîyanê xo yê pîsan mîyan kenê. Babete têna bi Sedat Peker, Mehmet agar û Suleyman Soylu sînordar nîya. Babete dewleta ke bîya çete. Erdogan zî wayîrê nê çeteyan vejîya.

Ganî ma vera nê çeteyan pîya têkoşîn bikerê, ganî komel vera nînan vengê xo berz bikero. Nê kesî tetîkkêşê JÎTEMî yê, mesuldarê polîtîkaya vêşnayîşê dewan ê. No pûyayîş eşkera keno ke partîya ma têkoşîn û vateyanê xo de çend heqdar a. Coka heta welatêkê demokratîlî ma do têkoşînê xo rê dewam bikerê.

Tecrîd mekanîzmayêka nê çeteyan a. Keye, wasî, avûkatê Birêz Ocalanî û çalakîkerê grevê vêşanîye seba wedaritişê tecrîdî tim veng danê. Ewro grevê vêşanîye roja 183. de dewam keno. 768 huqûqnasan seba pêvînayîşê bi Ocalanî veng da. Têkoşînê vera tecrîdî wayîrvejîyayîşê demokrasî, azadî û heqan o.

Pêro hemwelatîyî binê krîzê ekonomîkî de xeniqîyenê la qesre zewq kena. Pandemî de qet yew fon seba kedkaran nêşuxilîya. No îqtîdar dişmenê cinîyan, kedkaran û şarî yo. Cinîyî vera vêşanîye û krîzî têkoşîn kenê la rejîmê yewkesî mîlyon dolaran seba operasyonî xerc keno, çimeyanê welatî pêşkêşê çeteyan keno. La cinîyî do verê nê dewranî bigêrê.''