Hemsereka KCDyî û Wekîla HDPyî Leyla Guven tewrê xebetanê kongreya pîle yê Rêxistina HDPyî ya Îstanbulî bîye. Kongeraya Pîlî ya 4. do 23ê sibate de bêra serûberkerdene. Guvene pare kerd ke bingeyê pêro meseleyan de çaresernêkerdişê meseleya kurdan esto û bale ante ser ke kurdî hînî qebul nêkenê ke bêstatu biciwîyê.

Çarçewa xebatanê kongre de qezaya Fatîhî ya Îstanbulî de otêlêke de komeleyan reyde kombîyayîşêk ame kerdene. Wekîlê HDPyî Leyla Guven, Alî Kenanoglu, Merale Daniş Bektaş zî tewrê kombîyayîşî bîyî.

Hemserekê HDPyî yê Îstanbulî Erdal Avciyî ard ziwan ke şarê kurdî seserra 21. de hîna bihêz û birêxistin o û vat: ''Ganî her komele bi otobusêke bêra tewrê kongreya ma biba.''

Hemseraka KCDyî Leyla Guven zî kombîyayîş de qisey kerd û bale ante ser ke semedê şerê Kurdîstanî ra ver bi metropolan koçî estî.
Guvene vat: ''Şima koç kerd la erjê xo ca nêverdî. Ez seba naye şima rê sipas kena. 15ê Sibata 1999î de vera Ocalanî komployo mîyanneteweyî ame kerdene. Waşt ke îradeyê kurdan bişiknê la nêeşkîyayî. Birêz Ocalan 22 serr ê ke tecrîd de yo.  Ê kenê ke fikranê Birêz Ocalanî asteng bikerê. 

AKP û CHP nêeşkenê çîyêk bikerê. Ma têna eşkenê çareserîya xo, xo bi xo bivirazê. 

Rayberê xoverdayîşê Rojawanî kurd ê. Kurdî 50 serr ê ke xo ver danê. Vejîya meydan ke kurdî do sereyê xo verê asîmîlasyonî û qirkerdişî nêarê war.

Tîrkîya de bingeyê pêro meseleyan de meseleya kurdan esta. Ganî ma naye hol bidê famkerdene. Ma moralê xo felsefeya Birêz Ocalanî ra gênê. Rojhelatê Mîyanênî de krîzêko pîl esto. La Birêz Ocalanî ra ber destê kesêkî de projeyêkê çareserkerdişî çin o.
Peynîya AKPyî do destê kurdan ra bêra. Peynîya şima nêzdî ya. Ma do xoverdayîş pîl bikerê û ser bikewê. ''

Guvene peynîya qiseykerdişê xo de venga komeleyan da ke bi hawayêkê xurtî  tewrê kongre bibê.