Heyetê HDPyî warê erdlerzî de cigêrayîşanê xo dewam keno. Hemhetkarê Hemserekan ê Berpirsîyarê Îdareyanê Herêmîyan Salîm Kaplanî û Wekîla HDPyî ya Mûşî Sevîme Coşkun derheqê kêmasîyanê herême û astengkerdişê hetkarîyan de qisey kerd. Kaplanî ard ziwan ke nêno qebulkerdene ke hetkarîyî bêrê astengkerdene.

Goreyê cigêrayîşanê Heyetê HDPyî dewlete hema zaf dewan û herêman reyde îrtîbatêk nêkerd. Heyetî da zanayene ke Xarpêt û Meletî de Kizilayî hema zî şaristanê xeyman nêrona.

Kaplanî babeta astengkerdişê hetkarîyan ê HDPyî ser o zî qisey kerd û vat: "Verê cû hetkarîyê ma ameybî astengkerdene la dewlete na înkar kerdbî. Reyna na rewşe ameye meydan. AFADî tirê ma yê hetkarîye yê ke Ayhan Bîlgen tede bibi qebul nêkerdî. Xîretanê Ayhan Bîlgenî ra dima AFADî destûr da ke ma kolîyanê hetkarîye teslîm bikerê. No nêzdîbîyayîş nêno qebulkerdene. Astengkerdişê hetkarîyanê ma huqûqê dişmenîye yo. Nê kerdişî şexsê şaredarîyanê HDPyî de vera şarê Meletî û Xarpêtî sey cezayêka kolektîfe ameyî kerdene. Ma reyna zî hetkarîyê xo dewam bikerê. Paştdayîşê şarî bi yewbînan zaf xurt o.''

Wekîla HDPyî ya Mûşî Sevîme Coşkun zî bale ante ser ke dewlete hema xo nêresna 60 dewan û AFAD bi hawayêkê xurtî xebatanê xo nêkeno. Coşkune eşkera kerd ke şarê herême bi xîretanê xo cenazeyê xo vetî. Coşkune vist vîrî ke bînaya ke rijîyaye û cinîyêka digane zî tede 5 kesan tede wefat kerd serra 2011î d4e raporê bixesarî girewt la nêameye morkerdene. Coşkune vat: ''Eke rewşa na bîna nêameyêne peygoşkerdene nê merdimî nêmerdêne. Ganî lezabez konteynirî bêrê ronayene. Merdimî tersenê ke teber de yan zî xeyman de bimanê."