Heyetê Rayberdişî yê Merkezê Partîya Şaran a Demokratîke (HDP)  derheqê senaryoyê AKP’yî û cipersayîşê îdarekaranê Amedî de eşkerayîyêk daye û nê pare kerdî:

Ma nê Kayanê Leyşinan Hol Zanê

''Ma qîrayîşê heme dayîkan eşnawenê, dejê înan fehm kenê û hurmetê ma înan rê esto. Gama ke seba ke hînî dayîkî hesran war mekerê ma destê xo yê haştîye derg kenê, ê ke destê ma hawa ra verdenê û bi pêrodayîş cevab danê, ê ke vanê ‘meselaya Kurdî çîn a‘ ma hol nas kenê. Reyna ma zanê ke ê ke talîmatê hêrişê Dayîkanê Haştîye yê laçiksipîyan danê, û Dayîkanê Şemeyî rê her qeyde heqeret û kenê û vera înan şîdet bica anê, qet nêşarmîyenê. Heman kesî nîka dejê dayîkan îstîsmar kenê û hîsanê pakan ê dayîkan semedê îqtîdarê xo binpay kenê. Çend serrî cuwa ver zî dayîkî şawitênê verê şaredarîyanê ma. Ma nê kayanê leyşinan hol zanê. Eşkerayîyanê keyeyan ra zî yeno zanayene ke ê bi fermanê Wezîrîyê Karanê Zereyî û Serokkomarî  têgêrenê. Medyaya paştgerê hukmatî zî bi nê xeberan wazena ke partîya hedef bikero.

 Ciwanî Rîyê Şerî ra Mirenê û Berpisîyarê Naye Îqtîdar o

Verê ronayîşê HDP’yî nê welat de meselaya Kurdî estbî û ciwanê Kurdan verê xo dayêne koyan û bi des hezaran kesî merdîbî. Rixmê nê zanayîşî ê ke semedê çareserîye gamêk nêerzene û derheqê HDP’yî de operasyon virazenê, fisatkarîya sîyasîye û îstîsmarê hîsan kenê. Ma reyna vanê ke keyeyanê ke qicê xo vînî kerdî ganî AKP-MHP yo ke polîtîkayanê dişmenîyê Kurdan û şerî rayra beno ra hesab bipersê. Ê ke meseleya Kurdî çareser nêkenê ê yê. Ciwanê nê welatî rîyê şerî ra mirenê û berpisîyarê nê mergan îqtîdar o.

Na Mesela Polîtîk a Bi Cipersayîşan Çareser Nêbena

Demê çareserîye de qicê ma nêmerdênê. Erdogano ke vatêne ‘meseleya Kurdî çîn a‘ berpirsîyarê merdişê ciwanan o. Parlamenter û îdarekarê partîya ma yê bajarî eşkerîye daye û semedê çareserkerdişê meseleye veng da. Dimayê naye derheqê înan de cipersayîş dest pêkerd. No çîyêko zaf manîdar o. mesela bi cipersayîşêk çareser nêbena.  Mesela polîtîk a. Bi dozgeran çareser nêbena.

Wa Meclîs Berpirsîyarî Bige û  Dejê Dayîkan Biqedîno

Rixmê naye ma reyna veng danê Serokkomar û îqtîdarî û vanê ke: ‘‘Bi zor û zextê asayîşî şawitişê keyeyan ê verê banê partîya ma şima çîyêk dest nêfînenê. Bêrê heme dayîkan ê ke bi serran o raştê hêrişê şima yêne,ma meclîs de goştarî bikerê. Wa heme partîye meclsî berpirsîyarî bigêrê û ma pêro pîya nê dejan biqedenê.‘‘