Hetkarê Hemsereka/ê Pêroyî ya/ê HDP'yî û Berpirsîyarê Îdareyanê Cayîyan  Salîm Kaplanî bi sernameyê "Şima nêşkenê bi kampanyaya reşkerdene û tehqîqatanê viraşteyan darbe bikê meşrû" eşkerayîyêk daye.

Kaplanî eşkerayîye de wazîfeyî ra dûrfînayîşê Hemşaredara Şaredarîya Pîl a Wanî Bedîa Ozgokçe ard vîrî û va: "Nuşteyê fermî mojnenê ke qeyûm darbeyêka plankerde yo." Beyan de ame vatene Ertane seba ke wehdanê xo yê wextê kampanyaya weçînayîşî lez bi lez bîyara cayî, bi çarçeweya mewzûata alaqeyîne û ser esasê lîyaqatî, tayê kesî tayîn kerdî. Ertane seba ke tayînê tayê kesan ê wextê qeyûmî ke bertîl û dizdîya înan ame eşkerekerdene û bîyo babeta tehqîqatê wezarete, batal kerdî yena mojnayene seke çîyêko bêhuqûqtî kerdo. Na zî  hişmendîya leyşine  ya tehqîqatî eşkera kena.‘‘

Dewamê eşkerayîye de de yeno vatene: "Îqtîdaro ke viraştişê operasyonanê zûr û şaşîyan de bîyê westa, nêşkenî îspat bikê ke Hemşaredarê me Bedîa Ozgokçe Ertan, Ahmet Turk û Adnan Selçûk Mizraklî quruşêkê şarî îsraf kerdo, nêşkenî îspat bikê ke înan bertîl girewt. Teyna verê pêro dinya de eşkenê xo rêzîl bikê, na ra ber zî nêşkenê  gamêke wetêr şêrî."

Peynîye de ame vatene: "Pê tehqîqatanê winasîyan şima nêşkenî Darbeya Qeyûmî meşrû bimojnî. Teyna îqtîdar û derûdorê înan nê tehqîqatanê naylonînan ra bawer kenî. Eke rast a zî şima gêrenî ke bêhuqûktî, talan, dizdîye bîvînî zaf meşêrî dûrî, biewnî neynike ra."