HDPyî da eşnawitene ke ewro saetanê nîmroje de kesêko biçeke hêrişê banê partîye yê Îstanbulî kerd. Ame vatene ke 7 reyî vera banê înan çeke ame teqnayene. HDPyîjan bi eşkerayîyêke nêrazîbîyayîşê ramot û vat ma heta ewro verê hêrişan de çok nêda do çirey çok nêdê.

Goreyê zanayîşanê ke ANFyî fînayî dest kesê ke hêriş kerd şi xo bano ke Mudirîya Asayîşî ya Beyoglu û Qeymeqamîya tede de yê xo nimit.

Badê hêrişî verê banê HDPyî yê Îstanbulî de bi eşkerayîyêke hêriş ame şermezarkerdene. Eşkerayîye de Hemsereka HDPyî ya Îstanbulî Elîfe Bulut qisey kerd. Bulute ard ziwan ke keso ke hêriş kerdo di rojî verê cu ameyo partîya înan de  çay şimita û vat no qewimîyayîşêko şexsî nîyo. Bulute vist vîrî ke hukmat û medyaya ci tim HDPyî sey hedef ramojne û vat no hêriş pabesteyê naye yo. Bulute bale ante ke keso ke hêrişê înan kerd remayo şîyo merkezê polîsan û vat vera ma her hetî ra hêriş kenê la ê do ser nêkewe.

Hemserekê HDPyî yê Îstanbulî Erdal Avciyî vat ziwan û polîtîkaya îqtîdarî nê hêriş rê zemîn amade kerd.

Parlamenterê HDPyî yê Îstanbulî Musa Pîroglu zî no hêriş sey vera heme hetanê muxalîf û demokratan hesibna û vat: ''Heme qewimîyayîşanê xiraban ê vera HDPyî ra îqtîdar mesuldar o. Ganî hêzê demokrasî vera nê hêrişan yew bî. Ya ma benê yew û hesabê înan persenê ya zî bedelê ci ancenê.‘‘

Eşkerayîye bi sloganana ‘HDP sareberz payra yo‘ qedîyaye.