Kongreya Pîle ya 5. ya HDPyî Anqara de bi şîarê 'Çareserîye ma de ya'  pê beşdarîya bi des hezaran kesan û bi coşî dest pêkerde. 

Seba Dîwanê Kongre Hetkarê Serekwekîlê Koma HDPyî Saruhan Oluç, wekîlî Dîlane Dîrayet Taşdemîr, Dersime Dag, Serpîle Kemalbay û Necdet Îpekyuz ameyî weçînayene. Kongre bi qiseykerdişê Pevîne Buldan  dest pêkerde.

Pervîne Buldan qiseykerdişê xo de nê çîyî ardî ziwan: ''Ma sey partîya cinîyan hêzê cinîyan zêdîna û kerd hêzo bingeyî yê sîyasetê demokratîkî. Hêzê vurnayîş û çareserîye HDP yo. Bi îtîfaqê demokrasî û Îtîfaqê Kurdîstanî zî hêvîya şaran zêdîyena. HDP do tim çareserîye de rolê xo bîyaro ca. Verê demokratîkbîyayîşê Tirkîya de astengîya tewr pîle meseleya kurdan û tecrîdê vera Abdullah Ocalanî yê. Bi operasyonanê îşxalî îqtîdar do nêeşko destkewteyanê kurdan çin bikero. Verê ma de weçînayîşî est ê. Bêguman HDP do netîceya nê weçînayîşan eşkera bikero. Rayîrê HDPyî rayîro hîrêyîn o. Çareserî ma yê. Ma nêzdîyê serkewtişî yê. Ya serkewtiş ya serkewtiş!''

Pervîne Buldan ra dime Hemserekê HDPyî Mîthat Sancarî pê selamkerdişê şarî dest pê qiseykerdişî kerd. Mîthat Sancarî vat: ''No girseyo pîl cewabê dewayanê kumpasan, operasyonan û hêrişan dano. Ma armanc kenê ke bi xoverdayîşî ameyoxê azadî awan bikerê. Seba ke HDP alternatîfê sîstemê înan ê zulmî yo ê ma ra tersenê û hêrişê ma kenê. Ma hêzê xo raştîyan ra gênê. Nê raştîyan ra yew zî meseleya kurdan a. Çareserîya meseleya kurdan pê şer, şîdet û pêkewtişî nêbena; pê demokrasî û dîyalogan bena. Ma kenê ke meseleya kurdan bêra çareserkerdene. Ma vînenê ke nîqaşê serê tecrîdî zî zêdîyenê. Tecrîdî biqedînê ke wa şar bizano Ocalan çi fikirîyeno. Wa partîyê bînî zî bizanê ke neseleya kurdan meseleyêka winasêne nîya ke wextê weçînayîşî de bêra vîrardene û biba hacet. Kam ke na mesele seba menfaatanê xo bişuxilno do bin bikewo.''