Herêma Keske ya paytextê Iraqî yê Bexdadî ya ke peynîya menga kanûne ra nata tim bena hedefê hêrişan, reyna vera ci hêriş ame kerdene. Goreyê zanayîşanê ke selahîyetdaranê Iraqî ra ameyî girewtene tewr tay 3 roketî Herêma Keske de kewtî ke Sersefîrîya Amerîka zî tede ya. Ame parekerdene ke hêriş de zerarêk nêresa kesêk.

Hêrişê vera Herêma Keske menga kanûne ra nata bîyî zêde û bi giranî vera dîplomat û leşkeranê Amerîka yê herême hêrişî yenê kerdene. Heta nika kesêkî zî berpirsîyarîya nê hêrişan nêgirewt xo ser.

Îdareyê DYA koma milîsanê Şîa ya terefgîrê Îranî hêrişan ra sey berpirsîyar vîneno. Bi fermanê Serekê DYA Donald Trumpî Fermandarê Hêzê Qudûsî yê Îranî Qasim Silêmanî yo ke seba operasyonêk teberê Îranî de bî û fermandaro payeberz ê Haşdî Şabîyî amebî kiştene.