Awbendê Ilisûyî yo ke hetê dewleta Tirkî ra yeno awankerdene Hesenkeyfê kanî yê 12 hezar serrî rê gefan waneno. Rixmê razînêbîyayîşê xeylî doranê dinya zî talanê xoza û tarîxî dewam keno û tay mendo ke Hesenkeyfo tarîxî temamî de binê awe de bimano.

Medyaya Norveç û Danîmarka demê çînkerdişê Hesenkeyfî bi sernameyanê ‘Mucadleyo bizor’ û ‘Tirkîya bajarê Kurdan ê kanî binê awe de verdana‘ kiriştê rojdemê xo. Makaleyan de qalê muhîmîya tarîxî û kulturkî ya Hesenkeyfî ame kerdene û bale ameye antene serê tarîxê Hesenkeyfî û ame vatene ke bi nê projeyî mîrasê dinya yo kulturkî yeno çînkerdene. Reyna medyaya Norveçî de ame vîrardene ke rixmê heme vervejîyayîşanê û çalakîyan Hesenkeyfî û Newala Dîcle bi Awbendê Ilisûyî yeno waştene ke binê awe de bêrê verdayene û tehlukeyê raşîyayîşî dewam keno. Medyaya Danîmarke de  ame vatene ke Tirkîya hetêk ra tarîxê Kurdan çîn kena û awa ke şina Iraq kemî kena, hetê bînî ra çarçeweya projeyî de 190 dewê ke kiştanê Dîcle de yê bi sebebo ke binê awe de yenê mendenê şarê herême mecbur maneno ke bar bikero.