Hunermend Kadîr Înanir seba ke beşdarê kayê tîyatroyî yê kitabê ''Devranî'' yê Hemserekê verênî yê HDPyî Selahattîn Demîrtaşî bî, hetê Wezîrê Karanê Zereyî Suleyman Soylu ra ame hedefkerdene. Heyetê Merdimanê Biaqilan zî vera naye nêrazîbîyayîşê xo mojan û Soylu şermezar kerd. Heyetî pare kerd ke ê Kadîr Înanir reyde yê.

Eşkerayîye hetê Hemserekê Pêroyî yê Komeleya Heqanê Merdiman (ÎHD) Ozturk Turkdogan ra ame wendene.

Eşkerayîye wina ya: "Kitabê Devranî yê Selahattîn Demîrtaşî çend rojan verê cû hetê Julîde Kural û Omer Şahîn ra Tîyatroyê Kenterî de bi kayê tîyatroyî ame pêşkêşkerdene. Tay sîyasetmedaran bi hawayêkê bêuslubî kay rexne kerd la Wezîrê Karanê Zereyî hînî zêdêr wêter şi û vera Kadîr Înanirî yo ke kay seyr kerdêne bi vatişanê bihêrs û giranan hedef kerd.

No nêno qebulkerdene ke wezîrêk merdim û hunermendan bi nê hawayî hedef bikero. Ma Kadîr Înanir reyde yê û ma venga wezîrî danê ke wa efûyê xo biwazo."

Endamê Heyetê Merdiman ê Biaqilan ê ke morê xo da eşkerayîye nê yê: Ahmet Faruk Unsal, Ali Bayramoğlu, Baskın Oran, Celalettin Can, Doğu Ergil, Etyen Mahçupyan, Fuat Keyman, Levent Korkut, Nihal Bengisu Karaca, Oral Çalışlar, OztUrk Turkdoğan, Vahap Coşkun, Yıldıray Oğur, Yucel Sayman.