2 mîlyon û 646 hezar û 211 îmzayê ke Rojawan de semedê azadîya Rayberê Şarê Kurdî Abdullah Ocalanî ameyî arêdayene, bajarê Cenevre yê Swîsre de Komîserîya Berze ya Heqanê Merdiman ê Neteweyanê Yewbîyayeyan (OHCHR) rê ameyî teslîmkerdene.

Vervatoxê Înîsîyatîfê Ocalanî rê Azadîye yê Rojawanî Îdrîs Saîf, Hemsereka Înîsîyatîfê Avûkatan ê Ocalanî rê Azadîye yê Sûrîye Xanime Ayo selahîyetdaranê OHCHRî reyde pêvînayîş kerd. Pêvînayîş de dosyaya  ke tede  2 mîlyon û 646 hezar û 211 îmzayî est ê, teslîmê înan bîye.

Badê pêvînayîşî heyet tewrê çalakîya roniştişî ya ke 25ê çeleyê 2021î ran ata verê Ofîzê Neteweyanê Yewbîyayeyan ê Cenevre de yena kerden, bi û eşkerayîye daye. Verî Hemsereka CDK-Syî Selma Surer derheqê tecrîdî qisey kerd û mesajê xurtkerdişê têkoşînî dayî. Dima ra endamanê heyetê Rojawanî qisey kerd.

Îdrîs Saîdî bale ante tecrîdê girenî yê serê Abdullah Ocalanî ser, vist vîrî ke 2 serrî ra zafêr o tira xebere nîna girewtene û vat: ''Ma bi mîlyonan îmzayê ke Rojawan de semedê azadîya fîzîkîye ya Abdullah Ocalanî arêdayî verî Strasbourg de teslîmê CPTyî kerdî û dima ra nê îmzayî Cenevre de teslîmê Komîserîya Berze ya Heqanê Merdiman ê Neteweyanê Yewbîyayeyan kerdî û derheqê  îşkenceyê tecrîdî de pêvînîyîşî kerdî.''

Xanime Ayo zî vat: ''Serêkanîyê, Efrîn û Girê Sipî ke hetê dewleta tirke û çeteyan ra ameyî îşxalkerdene, tede sûcê şerî dewam kenê. Şarê herême rê barkerdişî ferz kenê. Ma nê pêvînayîş de ardî ziwan. Ma waşt ke wa paştî medîyo dewleta tirke û wa şirê ser ke verê nê hêrişan bêro girewtene. Nê çeteyî hêrişanê vera Rojawanî rê dewam kenê. Hêrişanê hewayî de leşker û sîvîlî yenê qetilkerdene. Seba ke na tradejî bêro qedînayene ma waştişê xo selahîyetdaran rê ardî ziwan.''