Heyetê mîyanneteweyî û HDPyî tecrîdî ser o qisey kerd
Heyetê Haştîye yo Mîyanneteweyî şi zîyaretê HDPyî. Pêvînayîş de mesajê ''Ganî tecrîdê Îmarilyî bêro wedaritene'' vejîya vernî.
Heyetê Haştîye yo Mîyanneteweyî şi zîyaretê HDPyî. Pêvînayîş de mesajê ''Ganî tecrîdê Îmarilyî bêro wedaritene'' vejîya vernî.
Heyetê Haştîye yo Mîyanneteweyî yo ke wezîro verên ê karê zereyî û edaletî yê Îzlanda Ogmundar Jonassen zî tede yo şi zîyaretê merkezê pêroyî yê HDPyî. Heyet Hemsereka HDPyî Pervîne Buldan û Hetkarê Hemserekîya Karanê Teberî ra Berpirsîyar Hîşyar Ozsoy reyde ronişt.
Buldane pare kerd ke ê derheqê tecrîdê vera Rayberê Şarê Kurdî Abdullah Ocalanî de heyet reyde roniştî û vat: ''Heyet seba ke meseleya tecrîdî bikerê rojdem ma reyde ronişt. Pêvînayîşêko biqîmet bi. Ganî prosesê winasênî de Yewîya Ewropa paştî bida ma û zaf girîng o ke nê heyetî meseleya tecrîdî bikerê rojdem û seba ke tecrîd bêro wedaritene xebetan bikerê.
7ê tabaxa 2019î ra nata Birêz Ocalan reyde pêvînayîş nêno kerdene. Birêz Ocalan tepişteyêko normal nîyo. Partîya ma û şarê kurdî wazenê tecrîd bêro wedaritene. Sey her tepişteyî heqê Birêz Ocalanî zî esto ke avûkatan û keyeyê xo reyde pêvînayîş bikero. Ganî no goreyê keyfê hukmatî nêbo.''
Endama Partîya Karkeran a Îngîlîztanî Julie Ward pare kerd ke ê proses nêzdî ra teqîb kenê û vat: ''Na torre wextê grevê vêşanîye de vejîyaye werte. Ma wazenê ke na meseke welatanê xo de bidê famkerdene û bihîsgerîyêke awan bikerê. Ma do hukmat ser o teda zêdêr bikerê. Bi pêvînayîşê HDPyî şar hîna zêde mesele ra xeberdar bikerê. Ma zanenê ke HDP û kurdan ser o tedaya pîle esta. Têkoşîn dewam keno, ma do hetê kurdan de bibê.''
Warde bale ante ser ke înan seba pêvînayîşê Wezaretê Edaletî muracat kerd la hema cewabêk nêgirewt.