Hemsereka Konseya Rayberdişî ya KCK’yî Besê Hozate beştarê bernameyê Rojeva Welatî yê Stêrk TV’yî bîye û cewab da persanê rojnameger Ersîn Yildizî.

Xoverdayîş de Rolê Cinîyan Zaf Muhîm o

Hozate sere de xoverdayîşê şarê Kurdî silam kerd û nê vatî: ‘‘Vera faşîzmê AKP-MHP’yî xoverdayîşêko ercyaye esto. Ma umîd kenê ke do no xoverdayîş hîna gird bo. Rixmê heme hêrişanê îqtîdarî şar wayîrê îradeyê xo vejîyeno. Xoverdayîş de rolê cinîyan zaf mûhîm o.Heme xoverdayîşan de cinîyî vernîya sefan de cayê xo gênê. No xoverdayîş hîna keno bimana û bihêz. Îqtîdar sîyasetê çînkerdişê Kurdan rayra beno. Xespkerdişê şaredarîyanê Amed, Wan û Mêrdînî zî leteyêkê nê sîyastî yo. Seba ke destkewteyanê Kurdan werte ra wedarê Surîye û Iraq de zî kewtî mîyanê şerî.Tirkîya xora bi serren o şer de ya.

Eke Dewleta Tirkî Çareserî Wazena Muhatap Rayberîye yo

Nêzdîbîyayîşê Rayberîye zaf muhîm o. Ameyoxê Tirkîya vîneno û goreyê ci ercneno. Ganî pêvînayîşê Rayberîye hol bêrê famkerdene. Senî ke ma eşnawito ercnayîşê ciya-cîya estî.Tayî vanê Îmrali de pêvînayîş estî çareserî pawenê. No nêzdîbîyayîş û ercnayîşêko xelet o. Raşt nîyo. Eke Tirkîya wazenê mesele çareser bikero muhatap Rayberîye yo. Seba ke Rayberîye mesele çareser bikero ganî dewlete raşt nêzdî bibo.  Semedê çareserîya meseleya Kurdî, plan, projê û fîkrê Rayberîye estî.Tîya hetê dewleta Tirkî ra problem esto. Eke dewleta Tirkî razî bibo, meseleya Kurdî yena çareserkerdene. Tena bi Rayberîye çareser nêbena. Ganî dewleta Tirkî zî semedê çareserîye qerar bigêro.

PKK 40 Serrî yo Semedê Çareserîya Meseleya Kurdî Mucadele Keno

Sebebê meseleya Kurdî Rayberîye nê dewleta Tirkî ya. Xora vejîyayîşê Rayberîye semedê çareserîya meseleya Kurdî bi. PKK 40 serrî yo ke semedê çareserîya mesele mucadele keno. Semedê azadkerdişê Rojakewtena Mîyanêne, semedê pîya ciwîyayîşê Kurd, Tirk heme şaran mucadele keno.Dewleta Tirkî Kurdî înkar kerdî û bi serran vera Kurdan polîtîkaya qirkerdişî rayra berde. Ewro AKP-MHP zî heman polîtîka rayra benê.

Şarê Kurdî Wazeno Bibo Wayîrê Statuyî

Rayberîye vano ke ez çareserîye rê amade ya. Ganî dewleta Tirkî zî naye vaje. Eke dewleta Tirkî çareserîye rê amade ya, plan û projeyê ci estî, wa bêrê ma muneqeşe  û muxakere bikerê. Rayberîya vano ke ‘Ez amade ya, eke dewleta Tirkî zî amade ya, wa bêrê ma na mesele hewteyêk de çareser bikerê.‘ Semedê çareserî ganî dewleta Tirkî qerar bigêro û şiro Îmrali. Waştişê Rayberîye û şarê Kurdî eşkera yo. Kurdî wazenê ke wayîrê statuyî bê.Wazenê ke nasnameyê înan ê kulturkî û sîyasî bêrê naskerdene. Vakur de statuyo demokratîk Tirkîya letê nêkeno.Şarê Kurdî dewlete nêwazeno. Dewlete îqtîdar o, zulm o, îşkence yo, şer û qetlîam o. Ma nêvanê wa dewletî werte ra bêrê wedartene, ma vanê wa dewletî demokratîk bê.‘‘