Partîyê sîyasîyî û rayaumûmîye derheqê ameyoxê domanan de vera yewbînan ê. Rêxistinê heqanê merdiman û partîyê çepgîrî wazenê ke domanî bêrê ardene la partîyê rastgîrî yê nîjadperestî zî vera naye vejîyenê.

Norweçî bire daye ke 35 domananê Kampa El Holî do bîyaro welat. La ardişê cinîyêka DAÎŞije û 2 domanê nêweşî verê krîzî akerd. Endamê Partîya Ameyoxî û Wezîrê Malîye Sîv Jensenî xo hukmatî ra apey ant.

Fînlandîya de zî Wezaretê Karanê Teberî planêkê bi nameyê ''Operation Corp''î awan kerdbi û ew plan medya de eşkera bi.  Naye ra zî krîzêk ame meydan. Partîyê muxalefetî wazenê Wezîrê Karanê Teberî Pekka Haavîsto Dîwanê Berzî de do bêro hukmkerdene. Nê muneqeşayan ra dima çar partîyanê hukmatî bire daye ke 30 domanî cade bêrê ardene Fînlandîya.

Danîmarka zî dima ke 2 domanî ardî xebata ardişî vindarnaye. Her çiqas rêxistinê dezgehanê sivîlî û partîyê sosyalîstî rexne kenê zî Danîmarka nêwazena Kampa El Holî ra domanan bîyara welat.

Swêdî zî heta nika derheqê babete de birêke nêdaye. Wezîrê Karanê Teberî Ann Lînde vatbi: ''Wexto ke şertî musbet bibê ma do 50 domanan bîyarê.'' Na eşkerayîya bîye hedefê nêrazîbîyayîşan. 17 dezgeh û kesanê namdaran eşkerayîyêka hempare daye û pare kerd ke ganî domanê cade bêrê ardene welat.

Cinî û domanê Kampa El Holî seba Îdareyê Xoserî yê Rojawanî meseleyêka pîl ê. Îdareyo Xoser dano zanayene ke cinîyî nê dıomanan kenê radîkal. Îdareyo Xoser welatan ra wazeno ke hemwelatîyê xo berê welatê xo.

Hemserekê Buroyê Teberî yê Îdareyê Xoserî yê Rojawanî Abdulkerîm Omarî hewteyê vîyarteyî de şibi zîyaretê Wezîrê Karanê Teberî yê Fînlandîya. Omarî ardbi ziwan ke îmkanê madî yê înan çin ê ke nê doman û cergan rê biewnê. Omarî vatbi: ''Ma eşkenê vajê ke DAÎŞî El Hol kerd paytextê xo. Domanê ke Kampa Holî de benê pîl beno ke babîyê xo ra zî zêdêr terorîst bibê.

Temsîlkarê PYDyî yê Swêdî Şîyar Alî zî rojnameyê Goteborg Posten reyde qisey kerdbi û vatbi: ''Ma hînî nêeşkenî biewnê nê domanan. Tay welatî zî domanan gênê la dadîyanê înan verdenê. No goreyê tewirê ma yê humanîterî raşt nîyo. Ma domananê kampe fikirîyenê la ganî ma şehîdê xo zî bifikîrê. 27 hezar birîndarê ma estê. Ganî ma nînan zî bifikîrê.''