Komîteya Şaran û Bawerî ya KCK’yî bi wesîleya Roşanê Qurbanî eşkerayîyêk daye roşanê şarî bimbarek kerd û mesajê yewbîyayîş û mucadeleyî dayê.

Mesajê ra tayî cayî wina yê: ‘’ Sey roşananê peyênan nê roşan zî binê zext û hêrişê dewleta Erdogan-Bahçelî de yeno ciwîyayenê.Tecrîdo ke Rayberîya ma rê beno hemverê heme Kurdan de yeno bicaardene. Dewleta Tirkî heme ercanê merdimî û dînî înkar kena. Ciwîyayîşê Tirkîya faşîste qetilkerdişê Kurdan de vînenê.  Tena waştişê înan oyo ke Kurdan qir bikerê. Dewleta faşîste ke Kurdan înkar kena vera ci heme çalakî û aktîvîteyî meşrû yê. No hemen wextî de vecîbeyo neteweyî, merdimî û dînî yo. Ma sey Kurdan ganî heme heqanê xo bişuxulnê. Ziwano ke ê ti ra fam kenê o ziwan de ganî ma cewabê înan bidê. No wezîfeyê her Kurdî yê bionûrî yo.

Wa mero vîrakerdene ke Roşanê Qurbanî vera zalimanê ke sey Nemrût û Fîravûnî xo kerdo herinda hûmayî, serkewtişê tradîsyonê Îbrahîmî yo. Vera zaliman mucadele, bawerî, cesaret, israr û yewbîyayîş her tim ser kewto. Emelo tewr bixeyr o ke şima nê roşanî de bikerê oyo ke şima yewbîyayîşê xo bihêz bikerê û vera hêrişê dewleta Tirkî ya qirkerdoxe bivejîyê. Senî ke ma kesîya Erdoganî de vînenî munafiqî tim zurker ê û înkar kenê. Nê bi wasifnayîşî qalê qirkerdişê mazlûman kenê. Qirkerdişê şarêk sey serkewtiş vînenê. Ma ganî bizanê ke îbadeto tewr bimbarêk oyo ke ma vera na dewleta hêrişakare mucadele bikerê û estbîyayîşê xo bipawê. Ma xo vîra mekerê ke no wezîfeyê Kurdan o neteweyîyî yo. Ma şexsê hemra Helmetî de heme şehîdanê xo yad kenê û roşanê keyeyanê şehîdanê xo cîya bimbarek kenê. ‘’