Emîne Şenyaşara ke laj û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde roja 94. de nobeta edaletî rê dewam kena. Keyeyê Şenyaşarî serê sibayî pê dowîzanê 'edalet'î dest pê nobeta edaletî kerd.

Keyeyî twitterî de Wezîrê Edaletî Abdulhamît Gul, Wezirîya Edaletî, Baroyê Îzmîrî û Baroyê Anqara etîket kerdî û no mesaj pare kerd: ''Wa dosyaya qirkerdişî ya Nêweşxaneyê Pirsûsî bêra akerdene! Kam ke sûcdar o wa hesab bido. 3 serrrî verî 3 merdimê ma ameyî qetilkerdene. Qet yew selahîyetdar ney înkar nêkeno. Ma dozgerêkê çêrî wazenê ke wa çi hewce yo bikero.''