Emîne Şenyaşara ke laj û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde 81 rojî yo verê Edlîyeya Riha de nobeta edaletî kena.

Ferît Şenyaşaro ke şibi zîyaretê birayê xo tepişte Fadil Şenyaşarî vat: ''Birayê mi 3 serrî yo bi hawayêkê bêhuqûqî tepişîyeno. Bawerîya ma bi edaletî dewam kena. Birayê mi zî hêvîdar o. Rojêke do raştîye eşkera biba û birayê mi zîndanî ra vejîyo.

Ma qebul nêkenê ke keye de ronişê. Ma hê binê zulmî de yê. Pê paştdayîşî ma têkoşînê xo rê dewam kenê. 3 merdimê ma ameyî qetilkerdene. Ma soz da înan. Heta ke sûcdarî bêrê muhakemekerdene ma do têkoşînê xo ra fek vera nêdê.''