Konseya Rayberdişî ya KNKyî bi eşkerayîyêke serrgêra 5. ya xelisnayîşê Kobanê fîraz kerd.

Eşkerayîya KNKyî wina ya:

''Kobanê hîkayeyê destpêkî yê şorişê Rojawanê Kurdîstanî ya ke 19ê temmuza 2012î de gama verêne ya azadîye eştbî û hêzê rejîmê Şamî tasfîye kerdbi û îdareyê şaristanî vistbi xo destî.  Kobanê bi serewedaritişê xo bîye hedefê îşxalkeran. DAÎŞî tehamulê kurdan nêkerd û hêrişê şaristanî kerd. Dewleta tirke bi hawayêkê eşkera paştî da DAÎŞ. 

Kobanêyîjan YPG-YPJ reyde xoverdayîşêko pîl kerd. Kobanê bîye meydanê cengî yê vera wehşetî. 

Kobanê pêro Kurdîstan de bîye merkezê pawitişê welatî û dinya de bîye sembola roşnîye. Kurdî Kobanê de bîyî yew. Kobanê bi nê pêlê berzî û xurtî yê îtîfaqê zereyî û paştdayîşê dinyaya demokratîke 26ê çeleyê 2016î de wehşet û tarîya DAÎŞî ra ameye xelisnayene. DAÎŞ derba yewîne Kobanê de werde. Xelisnayîşê Kobanê ra 4 serrî dima sayê QSDyî herême DAÎŞî ra bi temamî ameye pakîkerdene. Seba merdimîye no serkewtişêko pîl bî. Ma QSD û hemkaranê ci zerrî û canî ra fîraz kenê.

No serkewtiş bi bedelêkê pîlî, bi keda hezaran şehîdanê bêmergan û xoverdayîşêkê çêrî ame destvistene. Ma sere de şehîd û xoverdayoxanê Kobanê, Rojawan û pêro Kurdîstanî bi rêz û hûrmetî yad kenê û verê înan de rîyê xo anê war.Nê esasî ser o ma serrgêra 5. ya Serkewtişê Xoverdayîşê Kobanê, serrgêra 6. ya ronayîşê Kantonanê Rojawanê Kurdîstanî û çinkerdişê DAÎŞî yê şarê ma yê Rojawanî, şaranê Kurdîstanî û yê dinya fîraz kenê. Û ma Şorişê Rojawanî rê serkewtiş wazenê."