HDKyî kombîyayîşê xo yê Meclîsê Pêroyî yê 1. yê Serdemê 10. bînaya xo ya Beyogluyî de  serûber kerd.
Kombîyayîş bi weçînayîşê dîwanî dest pêkerd. Qiseykerdişê detpêkî hetê Hemvervatoxê HDKyî Îdîle Ugurlu ra ame kerdene.

Ugurluye qiseykerdişê xo qala Komployê Mîyanneteweyî yê 5ê Sibata 1999î kerde ke vera Rayberê Şarê Kurdî Abdullah Ocalanî ame kerdene û vat: ''No tecrîd tesîrê her kesî keno. Şarê kurdî û tirkî vera tecrîdî nêrazîbîyayîşêko pîl mojna. HDK eşkeno nê nêrazîbîyayîşan birêxistin bikero.''

Ugurluye pare kerd ke AKP bi polîtîkaya notiran wazeno ke hêzanê xo yê milîsan awan bikero û vat: ''Notirî meseleyanê pîlan bivejê verê ciîyan.''

Ugurluye da zanayene ke xebatanê yewîya neteweyî ya kurdan de ê zî do rolêkê çalakî bigêrê û vat: ''Verê ma akerde yo. Têna warê rayîrî û metodan de çend astengîyê ma estê. Îrade û qerardarîya ma estê ke ma nê astengîyan derbaz bikerê.''
Hemvervatox Sedat Şenogluyî zî vat: ''Ma zanenê sîstemo kapîtalîst şer û rijîyayîş ma rê keno ferz la vera nînan kesê azadîwaştoxî û hêvîdarî estê.''

Qiseykerdişan ra dima kombîyayîş bi hawayêkê çapemenîye ra girewte dewam keno.