Kongreya Awankerdişî ya Dêrsimî: Ma paşt na kampanya nêdanê

Kongreya Awankerdişî ya Dêrsimî bi eşkerayîyêk da zanayene ke ê paşt kampanyaya Şaredarîya Dêrsimî nêdanê û vat ganî kampanya semedê pawitişê ziwan, kultur, bawerîye, xoza û ganîyan ê Dêrsimî bêro viraştene.

Kongreya Awankerdişî ya Dêrsimî (DÎK) ya ke dîaspora de faalîyetanê xo rayra bena derheqê kampanyaya ke hetê Şaredarîya Dêrsimî ra ameye destpêkerdene eşkerayîyêk daye û vat ê bi nê halê kampanya paştî ci nêdanê.

Ganî Şaredarîyê HDP’yî Sey Nimûne Bêrê Girewtene

Şaredarîya Dêrsimî bi şîarê ‘ ma wayîrê bajarê xo vejîyenê’ kampanyayêk daye destpêkerdene. Kongreya Awankerdişî ya Dêrsimî  derheqê kampanya de eşkerayîyêk daye û vat: ‘’Ganî verê kampanyaya paştdayîşî komîsyonêk bêro ronayene û deynanê qeyûmî safî bikero. Bi na kampanya deynê qeyûmî yenê dayanê coka ma paşt ci nêdanê. Eke kampanya yena viraştene  ganî semedê şarê nêçarî bêro viraştene. Qeyûmî tena madî zirar Dêrsimî nêda. Ziraro tewr pîl vera nasname, ziwan û ercanê kulturkî yê Dêrsimî bîyo.

Ma sey Kongreya Awankerdişî ya Dêrsimî vanê ke mucadeleyê vera rijnayîşê qeyûmî de ganî şaredarîyê HDP’yî sey nimûne bêrê girewtene. Şaredarîye weqif yan zî dezgehê xeyrî nê dezgehê xizmetî ya. Wezîfeyê Şaredarîye şarî ra hetkarî girewtiş nê şarî rê hetkarîye kerdişo. Ûmid û ameyîş bi nê tewirî nêbêno. Rayîro raşt qeyûmî ra hesab bêro persayene û şarî rê xizmet bêro kerdene. Eke kampayayêk yena viraştene ganî semedê pawitişê ziwan, kultur, bawerîye, xoza û ganîyan ê Dêrsimî bêro viraştene. Kampanyayêkê semedê menfeatê şarî yenê viraştene rê ma paştdayîş rê amede yê la seba ke na kampanya semedê şarî nêna viraştene ma paşt ci nêdanê.''