Vervatoxê HDPyî gunay Kubîlayî bale ante ser ke îqtîdar pereyan dano weqif û komeleyanê terefgîranê xo û no suc o. Şîrketa Başketgazî Kizilay ser o Weqfa Ensarî ra 8 mîlyon dolarî dayî. Kubîlayî derheqê babete de tay ercnayîşî kerdî.

Kubîlayî vat: ''Weqfa Ensarî de serebûtê îstîsmarê domanan ameyî meydan û coka hetkarîya Kizilayî ya bi Weqfa Ensarî şermêk a. Kizilayî bi nê hawayî firsendê umûmîye îstîsmar kerdî. Dewlete zî bi nê hawayî bi hetkara nê sucî.''

Kubîlayî da zanayene ke peredayîşê seba komeleyan û weqifanê ke terefgîrê îqtîdarî yê sucêk o. Kubîlayî eşkera kerd ke Kizilayî zî nê komeleyan û weqafan rê pere dano û nê semedî ra bac dizneno. Kubîlayî vat: "No pûçbîyayîş o.''

Kizilayî erdlerzê Xarpêtî ra dima zî waştişê hetkarîya pereyan kerd. Kubîlay na babete de zî wina qisey kerd: "Kizilayo ke mîyanê têkilîyanê gemarinan de yo şewa erdlerzî şarî ra qasê 10 TLyî hetkarîya wazeno. Çîyêko tewr xirab zî seba persanê şarî yê ke derheqê bacê erdlerzî de yê cewabê wezîrê karanê zereyî û ê serekkomarî yo. Serekê Meclîsî vat: 'Bacî seba erdlerzî yenê arêdayene la hewce çin o ke ma seba erdlerzî înan xerç bikerê.' O çax çira binê nameyê bacê erdlerzî de no pere yeno arêdayene? Eşkera yo ke înan nê bacê erdlerzî bi armancanê xiraban û bi hawayêkê nêmeşrûyî xerc kerdî. Coka wina nimnenê ke ê bacî seba çi ameyî xerckerdene.''