Ame zaneyene ke Zîndanê Patnosî yê Girewteyî yê Tîpê L’yî de de mîyanê werî de lulikî vejîyenê û heme heqê înan ê bingeyênî yenê binpaykerdene.

Maya tepişte Emrah Bayramî, Perîşan Bayreme muracatê Komeleya Paştdayîşê Keyeyanê Tepişteyan  (TUAY-DER) û Komeleya Heqanê Merdiman (ÎHD)  kerd û waşt vera binpaykerdişê heqanê tepişteyan ê Zîndanê Patnosî yê Girewteyî yê Tîpê L’yî  çîyêk bikerê. Bayrame da zanayene ke lajê ci bi rayîrê telefonî aye ra nê vatî: ’’Lulikan kenê mîyanê werê ma. Erzenê odayanê ma ser. Semedê mengêk qedexeyê pêvînayîş û îrtîbatî da ma. Ma rê nêngan çînenê, heqaret kenê. Nê heme zî bi waştişê mudirê zîndanî yenê kerdene. Eke wina dewam bikero, do zîndan ra cenazeyê ma bivejîyê.’’