Roniştişo verên ê dewaya vera Komeleya Paştdayîş û Hetkarîye yê Alîmanê Dînî (DÎAY-DER) ewro Mehkemeya Cezaya Girane ya Îstanbulî ame kerdene. Dewa de Serekê DÎAY-Derî Ekrem Baran zî tede de 8ê ci tepişte 23 malayî yenê muhakemekerdene. Ekrem Baran, Hafîf Tunç, Nezîr Erdemci, Mehmet Emîn Aslan, Sefa Mehmetoglu, Aydin Ayhan û Mehmet Înan tewrê mehkeme bîyî. Tepişteyê bînî bi sîstemê SEGBÎSî tewrê mehkeme bîyî. Malayê ke hepsê keyeyî de zî mehkeme de hazir bî. Xeylêk wekîlê HDPyî û îdarekarê partîye yê  Îstanbulî yê zî tewrê mehkeme bîyî.

Avûkate Ayşe Acinikli vat: ''Na dewa de yew komele yena îllegalîzekerdene. Hutbeyo kurdkî sey sûcî yeno ramojnayene. No binpaykerdişê hurîyetê dîn û wîjdanî yo. Qiseykerdişê ke çalakî û aktîvîteyan de ameyî kerdene ganî çarçewaya azadîya îfadeyî de bêrê destgirewtene. Coka werte de sûc çîn o.'' Reyna avûkatanê bînan zî vera nêheqîye û bêhuqûqîya ke malayan rê bîya de qisey kerd û beraatê înan waşt.

Serekê DÎAY-DERî Ekrem Baran zî îfade kerd ke komalê înan çewî ra talîmat nêgena, bi paştdayîşê madî manevî falîyetanê xo rayra bena û vat: '' Ma xoser karê xo kenê. Eleqeya ma bi KCKyî çîn a. Ma têna semedê hetkarîya feqîran gurîyayî. Kurdkî yena terorîzekerdene. Vanê ma çekuyê rêxistine şuxulnayî. Çekuyê ke ma pê yenê sûcdarkerdene Kûrano Kurdkî yo ke Dîyanetî veto de zî estê.'' Reyna malayanê bînan zî ard ziwan ke înan goreyê bawerîya gureyî kerdî û bîlasebeb ameyî sûcdarkerdene û waşt wa bêrê veradayene. Badê pawitişê avûkatan heyetê mehkeme qerar girewt ke roniştiş do 21ê sibate de bêro domnayene.