Maya Wekîla Partîya Demokratîke ya Şaran (HDP) ya Şirnexî Nurane Îmîr Kadrîye Îmîr (70) gama ke Almanya ra ameyêne Meydanê Teyara yê Esenboga yê Anqara de ameye destbendkerdene.

Wekîle Nurane Îmîr a ke Ajansê Xeberan ê Mezopotam ya rê qisey kerd vat înan gama ke pasaportê xo dayî ame vatene ke derheqê maya ci de qerarê cigêrayîşî esto û ameye destbendkerdene. Îmîre ard ziwan ke înan derheqê dosya de zayanîş nêgirewto û vat qerarê destbendkerdişî hetê Mehkemeya Cezaya Aslîye ya 8. ya Anqara ra 2019 de ameyo girewtene. Îmîre ard ziwan ke maya aye nêweşa, verê demêkê kilmî emelîyet bîya û rîyê problemanê weşîye ra înan aya arde Anqara. Îmîre bale ante ke maya ci tim û tim yena Tirkîya şina heta nika çîyo wînayên çînêbi û vat badê kontrolê weşîyê do maya ci bêro berdene Şûbeyê TEMî.