Mêrdîn de nobeta xoverdayîşî ya 14’ine ameye viraştene

Parlamenterê HDP’yî yê Êlihî Mehmet Ruştu Tiryakîyo ke nobeta xoverdayîşî ya Mêrdînî de qisey kerd vat ê do vera qeyûman xoverdayîş xurt bikerê.

Nobeta xoverdayîşî ya Mêrdînî ya ke vera xespkerdişê şaredarîyanê Amed, Wan û Mêrdînî yê HDP‘yî yena viraştene roja 14’ine de dewam kerde.

Nobeta xoverdayîşî ya ke qezaya Artûklû de ameye viraştene hemserekî, hemşaredarî, parlamenterî û endamê meclîsê şaredarîyê yê HDP’yî tewrê ci bîyî. Çalkîya ke sloganê xoverdayîşî ameyî eştene de parlamenterê HDP’yî yê Êlihî Mehmet Ruştu Tiryakîyî qisey kerd. Tiryakîyî bale ante 1’ê Êlule Roja Haştîye ya Dinya ser û va: ‘‘Destûr nêdanê ma çalakîye viraze, esasî de ê ke qanûn binpay kenê qeyûmî.‘‘ Dimayê ekerayîye grûbe bi tîlîlî û sloganan ver bi banê HDP’yî yê Bajarî rayra şîye û çalakîye qedînaye.