Buroyê Huqûqî yê Asrinî derheqê pêvînayîşê  bi Rayberê Şarê Kurdî Abdullah Ocalanî de eşkerayîyêk daye.

Eşkerayîye de ame vîrardene ke avûkatanê înan 07.08. 2019 muwekîlê xo Abdullah Ocalanî dir pêvînayîş viraşto û nê ameyî parekerdene: ''Pêvînayîş de derheqê  xeylî babetan de ame qiseykerdene la babeta bingeyêne tekîlîya Kurdan û Tirkan û rewşa şerî bî. Birêz Ocalanî tekîlîyê Kurdan û Tirkan ê ke Ahlat û Malazgîrtî de dest pêkerdî  heta 1921’î ercnayî û ard ziwan ke ganî na babete de  heme dormeyê hîsdarî goreyê raştîye tê bigêre û tarîxê  û tekîlîyê Kurdan û Tirkan rê  raşt nêzdî bê. Birêz Ocalan  rîye polîtîkayanê pêkewtiş û şerî ra rewşe biqisawet vîneno û vano ke polîtîkaya ke 40 serrî yo ke yena domnayene de israkerdiş do nêtîceyanê hîna giranan bîyaro. Ganî her kes naye bivîno.

Birêz Ocalanî ard ziwane ke hewldayîşê çareserîya demokratîke yê demê Ozelî hetê kontragerîlla ra ame sebotekerdene û no hetê her kesî ra yeno zanayene û vat;  nê hêzê ke vera çareserîye yê, ewro sey xo nêbîye zî potansîyelê înan ê şervetişî esto.  Ozalî serra 1993 de vatêne ‘bi şerî çareserîye nêbeno’ ewro îradeyo ke qerardarîya Ozalî ramojno çîn o. Birêz Ocalanî tecrîdê 20 serran o ke serê ci de yeno domnayene sey pabesteyê şerî yo ke yeno ciwîyayene hesibna û ard ziwan ke o vera naye 20 serrî yo bi xeta xoverdayîşî cewab dano.

Birêz Ocalanî vat: ‘’ Ez hewl dana ke semedê Kurdan ca abikerê. Bêrê ma meseleya Kurdî çareser bikerê. Ez vana ke ez hewteyêk de îxtîmalê rewşa pêkewtişî werte ra wedarnena. Ez çareser kena. Bawerîya mi mi ra esta. Ez semedê çareserîye amade ya. La ganî dewlete û aqilê dewlete zî çîyo ke hewce keno bikero’’. Hemen wextî de bi wesîleya roşanê şarê ma yo ke zerîya xo daya mucadeleyê demokrasî û haştîye bimbarek kerd û zîndanan rê silamê xo yê taybetî şawitî.’’