Hemşaredarê Şaristanê Pîlî yê Amedî Adnan Selçûk Mizrakli pê vîdeo konfanransî beşdarê panelê Têgêrayîşê Verba Nîjadperestîye û Paştdayîşê Mabênê Şaran (MRAP) bi. Mizrakliyî roniştişê konseye rê selam kerd û vat seba ke vejîyayîşê teberê welatî ci rê ameyo qedexekerdene nêşikîyo tewrê panelî bibo.
'Ma Bi Dîktatorîye Wezîfe ra Ameyî Dûrfînayene‘
Mizrakliyî vat, "Ma weçînayîş de bi se ra 63 rayî ameyî weçînayene û ma waşt karê xo rê dewam bikê, şima reyde bê, labelê rîyê sîstemê îqtîdarîyo ke wazeno rejîmo şexsî welatê ma de serdest bike ra vejîyayîşê teberî ma rê ameyo qedexekerdene. Ma wezîfeyî ra ameyî dûrfînayene, coka ma neçar ê ke dûrî ra beşdarê konferansî benî."
Mizrakliyî veng da beşdaranê konferansî û vat: "Şima merdimanê ke beyannameyo ûnîversal ê heqanê merdiman tasdîq kerd û wazenê ganî verba nê muameleyan vejê. Ez wazeno tîya ra veng bido şima; bêrê komîsyonêk saz bikê, şirê Amed, Mêrdîn û Wan, şarî rê bipersê ke merdimê weçinîtî çira wezîfeyanê xo ra ameyî dûrfistene yan zî şarê herême qeraro ke ame dayene ra kêfweş ê yan nê. Heyf o ke Tirkîya de heqê merdiman ê bingeyênî yenê binpaykerdene."
'Wextê Vervejîyayîşî Ame‘
Mizrakliyî hevîya xo ya seba dinyayêka şerî ra dûre, dinyayêka haştîyane ard ziwan û qisyekerdişê xo bi nê vengdayîşî qedîna: ‘‘Wext ameyo ke herkes goş bidê wijdanê xo û verba nê kerdişan vinderê. Îdarekarê herême nîşanê demokrasîya welatêkî yê. Ma hêvî kenê ke şima do verba zordarîya ke ma rê kenî bêveng nêmanenê.‘‘